HIMNA-MADAT hmalakna tlangzarh

Project HIMNA-MADAT (Mizoram Against Drug Abuse and Tobacco) hmalaknaa buatsaih 'IEC Materials and Research Study' leh Modules-te chu nimin khan Vanapa Hall-ah tlangzarh a ni a; GAD secretary Ashish Kundra leh Planning secretary Dr C Vanlalramsanga ten an hmanpui.

HIMNA-MADAT module tlangzarhtu Ashish Kundra chuan, Mizoram chu ziak leh chhiar thiam tamna kawngah te, rálmuannaahte state dangte laka hma hruaitu a nih mek laiin, cancer leh HIV vei tam lamah pawh a berte zinga mi a nih thu a sawi a, "Heng thil ṭha lo do lêt tur hian zirlai naupangte an pawimawh hle a ni," a ti. Aizawl DC kaltlanga HIMNA-MADAT an buatsaih chu Mizo zirlai naupangte'n an hlawkpui ngei a beisei thu a sawi.

Ashish Kundra hian ruihhlo laka naupang an fihlim thei nana HIMNA-MADAT Project kal­tlanga buatsaih, pawl 5 leh pawl 6 zirlaite zir tur Module-I leh pawl 7 leh pawl 8-te zir tur Module-II a tlangzarh a; Planning secretary Dr C Vanlalramsanga'n “An analytical study of substance abuse among upper primary school students in Aizawl district' leh HIMNA-MADAT documentary film a tlangzarh thung.

Inkhawm hi Aizawl bawrhsap Dr A Muthamma-i'n a kaihruai a; IASE principal Prof. Vanlalhruaii'n HIMNA-MADAT chungchang a sawifiah a, project hnuaia sikul thlan chhuaha zirlaite an thil tih tawhte tarlan a ni. Vanapa Hall páwnah zirlaite'n ruihhlo leh vaihlo zûk leh hmuam hlauhawmzia an tarlanna lemziak hrang hrang pho chhuah a ni bawk.

Project HIMNA-MADAT hi June 21, 2017-ah ṭan a ni a, a tum ber chu - vaihlo, zu leh dawidawi ruih theih laka ṭhalaite an fihlim theih nana zirlai naupang an nih lai aṭanga zirtirna ṭha pek a ni.

Kum 2017 khan Aizawl district chhunga sikul 50-ah kalpui a ni a, HIMNA Club-te dinin, zirlaite chu kawng hrang hrangin ruihhlo ṭhat lohzia zirtir an ni ṭhin. Tunah chuan sorkar middle school 277-ah HIMNA Club din a ni tawh a; Aizawl DC kaihhruaina hnuaiah Health department, School Education department, Social Welfare department leh tlawmngai pawl hrang hrangte an thawkho a ni.