Ran chhiarpui chungchang inzirtir

India ram puma ran chhiarpui, All India 20th. Livestock Census neih tur pualin nimin khan Champhaia AH&Vety pisaah dis­trict level training buat­saih a ni a; chhiarpuia mawhphurhna neite thil tih dan tur an inzirtir.

AH&Vety deputy director Dr Lalchungnunga Pudaite chuan, ranvulh chu India rama thingtlang mite eizawnna pawimawh berte zinga mi a ni tih sawiin, "India sorkarin ran vulha eizawnna kawngah hmasawnna kawng a dap zel a, ran chi ṭha zawk kan vulh theih nan te, hlâwk zawka thar chhuah theih nante leh natna laka rante ven a nih theih nante scheme pawimawh tak tak a kalpui ṭhin," a ti.

Ran chungchanga sorkar scheme-te a hlawhtlin theih nan ram chhunga ran vulh dan leh a zat hriatna, Livestock Census chu a pawimawh hle tih sawiin Dr Lalchungnunga chuan, enumerator-te chu ṭha taka hna thawk tur leh, theih­tawpa lo ṭawiawm turin mipui a chah a ni.

Champhai DVO Dr M Zohmingthangi pawhin thu sawiin, Livestock Census atana enumerator tura thlan VFA-te chu fimkhur tak leh uluk taka chhiarpui kalpui tur te, dawhkâna chingfel mai lo a, a hmun ngeia kal chilh turin a chah. Siamthanzauvi Jahau, inspector of statistics-in Livestock Census neih tura ṭul leh pawimawhte a sawifiah bawk.

Ran chhiarpui hi kum 5 danah India ram pumpuiah neih ṭhin a ni a, in tinah lûtin ran vulh zawng zawng chipchiar taka chhiar ṭhin a ni. Mizoramah pawh ran chhiarpui hi hlawhtling taka nei turin inbuatsaih mek a ni a, in tinah luta ran chhiar turin enumerator-te ruat niin, an khaw chan bikah uluk takin ran awm zat an chhiar dawn a ni.