NHRC palaiin Kolasib a tlawh

National Human Rights Commission (NHRC)-a Thematic Special Rapporteur Dr Ashok Sahu, IES (Rtd.) chuan nimin khan Kolasib a tlawh a; Kolasib DC Dr Arun T leh SP Abhisek Dhania ten lo dawngdawngin, sorkar officer dangte leh Kolasib YMA sub-hqrs leh Kolasib MJA hruai­tute nen an inkâwm.

Dr Ashok Sahu chuan Kolasib a tlawh chhan sawiin, NHRC hmalakna pêng pakhat, naupang hna thawhtir (child labour) chungchang a ni tih a sawi a, "India chuan kum 2025-ah child labour tihtawp a tum a, chumi kaihhnawihah chuan Mizoram ka rawn endik a. Mizoramah chuan child labour awm bawk mah se, state dang nena khaikhinin dinhmun ṭha tak a ni," a ti.

Mizoramah mumal taka child labour survey neih hnuhnun ber chu kum 1995 a ni tih sawiin Dr Ashok Sahu chuan, "Data rintlak zawk a awm theih nan survey neih leh vat a pawimawh. Naupangte chu Right to Education Act-in a phût angin lehkha zirtir ngei ngei tur a ni," a ti a; construction work-a inhlawh ṭhinte tan chuan Building & Other Construction Welfare Board-a inziah luhin an thawh chhuah aṭanga 1% chu chhûn luh tur a nih thu a sawi..

Dr Ashok Sahu hian Kolasib Vengthara Salvation Army enkawl 'Enna In' a tlawh a; an hmalakna hrang hrang a enpui bakah, an harsatnate a sawipui. Home awm naupangte chu kum 18 an tlin hunah mahni kutkea an din theih nan vocational training lam ngaih pawimawh turin thawhtute a chah a ni.