Congress hi under 10-ah kan dah ka ring - Zoramthanga

MNF party chuan nimin khan Lunglei Venglaiah vantlang inkhawm neiin, 'MNF Sub-Hqrs. Campaign Kick Off' hun an hmang a, MNF president Zoramthanga'n a hmanpui. Zoramthanga chuan, Mizoram inthlanpui awm turah Congress party chu under 10-ah an dah dawn niin a sawi.

MNF President chuan, "Congress party hi ynder 10-ah kan dah ka ring. An candidate siam dan en ila, 'He lai bialah a tling zo ang' tih aiin, 'Candidate pek loh chuan lal chhungkuate dinna bialah an chhungkua an hung si a, an lung­awi loh a hlauhawm' tih chu an tehkhâwng a ni," a ti.

Zoramthanga chuan, Congress MLA ding lai chuang tam tak an awm tih sawiin, "An tlak an inrin vang nge, CM Bangalow aṭangin mahni mimal in Zarkawta mi an chei tlut tlut mai a ni," a ti a; Congress no. 2 R Lal­zirliana, an MLA Lalrinliana Sailo, Congress party headquarters-a hruai­tute leh worker tam takin Congress an chhuahsan chur chur niin a sawi.

MNF President chuan, kum 2018 inthlan dawnah a hlâwk ringin Rev. Chanchinmawia chu Zoramthanga leh MNF-te thah angin Congress party-in dâwtin an puh niin a sawi a, "Kan thah a ni lo tih hre chiangtu chu Congress party dâwta min puhtu leh Zoram mipui an ni. A hre chiang bertu chu Congress an ni nghe nghe," a ti.

Zoramthanga chuan, Rev. Chanchinmawia thih chung­changah, "Police te, Special Investigation Team te, CBI-te an chhuitir a, kan thah a ni lo tih an pawm a, Magistrate-in a nemnghet. Rev. Chanchinmawia chhungte pawhin politics a hmang tawh lo turin an ngen hial a nih kha. Kum 2008 inthlan dawnah thla ruk chhungin kan chhuichhuak ang, an ti a, pip e pup e an ti lo. Kum 10 chhung hian an ngawi vang vang ringawt. He leia roreltute chuan kan thah a ni lo tih an hre chiang tawh a, a dawt lehah chung lamin rel tawh rawh se," a ti a; tun aṭangin mipui vote hmangin chung lamin rorel hna a ṭan mek niin a sawi.

Lunglei district-a an candidate turte - Dr Vanlalṭanpuia - Lunglei North, Lawmawma Tochhawng - Lunglei East, C Lalrinsanga - Lunglei West, Dr K Pachhunga - Lunglei South, R Rohmingliana - Thorang leh F Robert Hmingthansanga - West Tuipui-te chawimawina parthi an hlan nghal a ni.