Office of Profit bawhchhiaah MLA 4 puh MPCC-in hma la turin Larsap an ngen
Mizoram Pradesh Congress Committee (MPCC) chuan MLA pali - Dr Vanlalthlana (ZPM), Prof. F Lalnunmawia (MNF), L Thangmawia (MNF) leh Dr Vanlalṭanpuia (MNF) ten Office of Profit an palzût nia an ngaih thu nimin khan Governor hnenah an thlen a, a ṭul anga hma la turin an ngen.
MPCC chuan, MZU danin a phal angin teaching staff-te'n civic right an nei tih tarlangin, "Amaherawhchu, MP/MLA thlan tlinte chuan university-ah emaw, state legislature-ah emaw an duhna zawk zawkah hlawh an la thei ang, tih a ni. MLA palite hian MZU aṭanga hlawh la reng chungin MLA Legislature Secretariat aṭangin MLA-te tana hamṭhatna an la vek a ni," an ti.
MZU-ah hlawh an la a nih chuan MLA-te chuan MZU-a facility awm ang ang leh an hmuh tur (entitle) chin an la vek tur a nih thu tarlangin MPCC chuan, "MZU-ah hlawhpui chauh la a, MLA anga hamṭhatna dang zawng dawng tura thutlukna an siam leh si hi dan bawhchhiatna chiang tak a ni," an ti a; MZU aṭangin leave pawh an la lo niin an sawi.
Congress party chuan, MLA pali zinga pathum - Prof. F Lalnunmawia, L Thangmawia leh Dr Vanlalṭanpuia te chu SEDP hnuaia board hrang hrangah vice chairman an nih tel thu tarlangin, "Board vice chairman an nihna denchhen hian TA/DA class-I officer-te entitle ang pek an ni. Hei bakah minister of state rank-a dah an ni a, chu chu Indian Constitution Article 164 (IA)-in minister awm thei zat tur a bithliah bawhchhiatna a ni," an ti.
MLA palite hian India khua leh tui ṭhate'n dan an zawm turte an zâwm ṭha em tih chhui chhuak a, dan an zâwm famkim lo a nih chuan an chungah a ṭul anga action la turin MPCC chuan Governor an ngen.
MLA-te Office of Profit bawhchhiaa puhna lehkha chu Congress ṭhalai (MPYCC) president Dr Lalmalsawma Nghaka chuan Governor secretary K Lalthawmmawia hnenah a hlân. Lehkhaah hian MPCC secretary Lalthanglawra Ngurte leh MPYCC general secretary S Lalrinawma ten hming an ziak a ni.