Phainuam sikulah BSF leh SSB

Assam leh Mizoram ramri buaina vanga sorkar laipuiin ramria awm tura a dah, Mizoram lama awm tur BSF leh Assam lama awm tur SSB-te chu Phainuam khaw hmáwra mimal rama Bengali Medium School building-ah an awm ve ve dawn.

Phainuam Branch YMA hruaitute hnen aṭanga Vanglaini thu dawn danin, Assam sorkar chuan tu tih hriat lohte'n bomb hmanga an tihchhiat Bengali Medium School-ah SSB-te a dah a ni. Hei vang hian bialtu MLA Lal­rinsanga Ralte chuan sikul bulah hian BSF-te dah ve ṭha a tih avangin, a hmalaknain Phainuam khaw­tlang mipuiin BSF-te awmna tur nimin khan siam an tum a ni.

SSB-te chuan BSF-te awmna tur sak an phal lo a, ramri dep district pahniha official-te an inbiak hnuah sikulah hian BSF leh SSB-te chu awm ve ve mai turin thutlukna siam a ni.