Vairengte naupang bo thiin hmu Naupang thlalak tihdarh pawi ti
November 11, 2020-a chin hriat loha awm Lalsiamthara (kum 2 leh a chanve) s/o C Zothanmawia, Vairengte chu nimin chhun dar 1 vel khan Vairengte khaw rama Tuidaikhur luiah thia hmuh a ni. Hetihlai hian Kolasib district-a Child Welfare Committee (CWC) leh District Child Protection Unit (DCPU) chuan naupang thlalak tihdarh pawi an tih thu an tarlang.
Vairengte aṭanga thu dawn danin, Lalsiamthara ruang hmuhna hi a pain a kalsanna aṭanga km. 5 vela hlá a ni a; luia li tê, thûk vak loah thia hmuh a ni. An hmuhna hmun hi a hma pawhin a zawngtute an kal tawh a, mahse, an hmu lo.
Naupang ruang endik tur hian Aizawl aṭangin Forensic Science Laboratory-a mithiamte'n Vairengte an pan nghal a, he thu ziah lai hian an endik mek.
Vairengte Joint YMA hruaitute hnen aṭanga thu dawn danin, Lalsiamthara ruang hi vawiin zingah postmortem hman a nih chuan chawhma dar 11-ah vui a ni ang.
CWC leh DCPU chuan thuchhuah inṭâwm siamin, Vairengte naupang kum 2 leh a chanve mi bo chungchangah, naupang bo hmaa lo awmpuitu mipa naupang kum 9 mi thlalak leh video social media hrang hranga tihdarh a ni chu pawi an tih thu an tarlang.
Kolasib CWC leh DCPU-te chuan, pawi khawihna leh thil thleng eng emawah naupang hmél media-a tihlan chu Juvenile Justice Act, 2015 Section 74 hmangin thla ruk chhung tàn emaw, Rs. 2,00,000 thleng chawi emaw, a pahnihin emaw chawi theihna a nih thu an tarlang a ni.
Tun hnuah chuan naupang hmél lanna thlalak media-a tarlan ang chi chu thleng tawh lo se an duh sawiin CWC leh DCPU-te chuan, social media-a naupang demna na tak tak post ṭhin lo turin mipui an ngen.
Thu dawn danin, Vairengtea naupang bo chungchangah hian, an kalnaa kal ve mipa naupang kum 9 mi, mipa puitling pakhat nena an awm dûn leh naupang bo chungchang sawina thlalak (video) chu social media hrang hrangah a darh a; YouTube-ah pawh hmuh tur a awm nual. CWC leh DCPU-in hma an lâk hnuah YouTube-a dahtute chuan an paih hlawm a ni.
Kolasib CWC leh DCPU-te chuan, Vairengtea police, khawtlang leh a chhehvela mipuite, naupang bo zawnnaa an thawh-rimna leh inpekna lawmawm an tih thu an
tarlang bawk.