COVID-19: Mizoram dinhmun Hripui vei 48 hmuh belh a ni
November 16, Thawhṭanni khan Mizoramah Covid-19 vei mi 48 hmuh chhuah a ni a, nimin khan mi pali chhuahtir an ni thung.
Covid-19 positive hmuh chhuah thar mi 48-te chu mipa 33 leh hmeichhia 15 an ni a; ZMC laboratory-a hmuh mi 27 leh Rapid Antigen Test (RAT) hmanga hmuh mi 21 an ni. TrueNAT-PCR hmanga endik aṭangin hripui vei hmuh a ni lo.
Nimin khan Covid-19 laka fihlim tawh mi pali chhuahtir an ni a; SRH-ZMC aṭangin mi pakhat leh Lawngtlai CCC aṭangin mi pathum an chhuak a ni. Nimina Vanglaini-a tarlan hman lohte nen Thawhṭannia chhuahtir zawng zawng chu mi 39 an ni bawk.
Mizoramah Covid-19 positive mi 3,444 hmuh chhuah a ni tawh a, mipa 2,561 leh hmeichhia 883 an ni. Nimin tlai dar 5 thleng khan mi 2,919 (84.76%) chhuahtir an ni tawh a, mi panga (0.14%) thi tawhin, enkawl mek mi 520 (15.10%) an awm.
Mizorama hripui vei hmuh tawhte zinga mi 1,575 chu Mizoram chhunga kái an ni a, mi 1,869 chu state páwn aṭanga rawn lut an ni.
November 16, Thawhṭanni khan Mizoramah swab sample 1,579 endik a ni a, chu'ng aṭang chuan Covid-19 vei mi 48 an hmu chhuak. Sample endik dan chu ZMC laboratory-ah mi 507, TrueNAT-PCR hmangin district pasarihah mi 79 leh, RAT hmangin district 10-ah mi 993 an ni.
Sorkar thuchhuah tarlan danin, ZMC-a hmuh chhuah mi 27-te chu mipa 15 leh hmeichhia 12 niin, nausén thla 2 aṭanga kum 60 inkar an ni a, Aizawl district-a swab sample lak vek an ni. An zinga mi 21 chu Mizoram chhunga kái an ni a, mi paruk chu tun hnaia state páwn aṭanga rawn lut an ni thung.
State páwn aṭanga rawn haw zinga pahnih chu Sihphira hmeichhe kum 32 mi leh a fapa kum 4 mi, Nepal aṭanga rawn haw an ni. Lailak khuaa mipa kum 29, Assam Regiment sipai, Jammu & Kashmir aṭanga rawn haw te, Maubuang khuaa mipa kum 32, West Bengal aṭanga rawn haw leh, Tuikhuahtlanga hmeichhia kum 27, Delhi aṭanga hawte an awm bawk. An vai hian quarantine facility-a awm lai niin, symptom nei an awm lo.
Mi pakhat dang chu mipa kum 33, Indian Railways-a thawk, West Bengal aṭanga rawn lut a ni a, hotel quarantine-a awm niin symptom a nei lo. Mizoram chhunga káite dinhmun chu table-ah tarlan a ni.
RAT hmangin hripui vei Aizawlah mi pahnih, Lunglei district-ah pali, Champhaia pahnih leh Lawngtlaiah mi 13 hmuh chhuah a ni a; an zinga 18 chu Mizoram chhunga kai niin, mi pathum chu state páwn aṭanga rawn lut an ni thung.
Mizoram páwn aṭanga rawn lutte chu - Tlabunga mipa kum 50, SIB mi, Assam aṭanga haw te, Border Security Force mi kum 27 leh 37 mi, Bihar aṭanga lutte an ni a; Covid-19 symptom an nei lo vek. Mizoram chhunga káite chanchin chu table-ah tarlan a ni.