MES (PWD cadre)-a dah tumin Absorption a dilna a hnûkdâwk

Mizoram sorkarin Mizo­ram Engineering Ser­vice (MES) junior grade (PWD cadre) tura Zo­sangliana Ralte dah ngheh (absorb) a tumnaah, Zo­sangliana Ralte chuan absorb a dilna chu a hnûk­dâwk nia thu dawn a ni.

Tarlan tawh angin, Department of Personnel & Administration Reforms chuan November 5, 2020 khan hriattirna (notifi­cation) chhuahin, Bamboo Development Agency (BDA) hnuaia assistant engineer (AE) Zosangliana Ralte chu MES Rules, 2013-a Rule 34-in a phal angin MES Rules 22(6)(a)(1) hnuaiah 'one time relaxation' hmangin MES (PWD cadre)-a dah ngheh tura tih a nih thu a tarlang.

Hemi chungchangah hian Mizoram PWD Engi­neering Service Association (MIPESA) chuan November 12 khan PWD Engineer-in-Chief hnenah lehkha thawnin, BDA hnuaia thawk, PWD-a a ngheta thawk tura direct-a lâk chu ṭha lo an tih thu leh a ṭul anga hma la tura ngenna an thawn. MZP pawhin November 16 khan thuchhuah siamin, an duh loh thu an puang bawk.

MZP hruaitute chuan nimin chawhma lam khan chief minister Zoramthanga, PWD enkawltu ni bawk chu a pisaah an hmu a; MES-a dah ngheh tum Zosangliana Ralte chuan absorption a dilna chu a hnuhdawh thu, Chief Minister chuan MZP hruaitute a lo hrilh.

Zosangliana Ralte pawhin engineer ho WhatsApp group-ah nimin zing lam khan absorption a dilna a hnuhdawh (withdraw) thu leh, thiam lohna a nei a nih chuan ngaihdam a dil thu a dah (post) nia thu dawn a ni.