2022-23 budget hi mipui pual ni loin Chief Minister pual budget a ni - MPCC

Mizoram Pradesh Congress Committee (MPCC) chuan, kum 2022-23 Mizoram budget-ah chief minister enkawl Finance department-a sum dah a tam bik hle tih sawiin, "Kum 2022-23 Mizoram budget hi mipui pual budget ni loin, chief minister Pu Zoramthanga pual budget a ni," an ti.

MPCC Media department hotute chuan February 26, Inrinni khan Aizawl Press CLub-ah thuthar thehdarhtute an kâwm a; an chairman Dr Lallianchhunga chuan, Chief Minister enkawl Finance department-a major works-ah ringawt pawh cheng nuai 96,249 dah a ni tih sawiin, "CSS nuai 35,000 nen phei chuan nuai 1,31,249.99 dah a ni. Kum dang ang bawkin mahni dinhmun sawh nghehna tura duhsak bikte vulh nan a ṭangkai leh hle dawn," a ti.

Hetih lai hian, Planning, LAD, School Education, Higher & Technical Education, Agriculture, Horticulture, AH&Vety, Rural Development, Transport leh Tourism department-ahte a taka hmasawnna hna thawhna tur major works-ah sum dah a ni lo tih Lallianchhunga chuan a sawi.

Major works-a sum dah ve lohna department changtu minis­ter-te'n hma­sawnna hna thawh an duh a nih chuan Chief Minister nasa taka an tlawn a ngai leh dawn tih sawiin Dr Lallianchhunga chuan, "Chu­vangin, kum 2022-23 budget hi mipui pual budget ni loin, Finance minister Pu Zoramthanga pual budget a ni chiang hle. Pu Zoramthanga hi financial dictator angah a insiam tihna a ni," a ti.

MPCC Media Chairman chuan, Congress sorkar laiin June 30, 2016 hnuah RBI aṭangin Ways and Means hmangin sum pûk a ni tawh lo tih sawiin, Mizoram sum leh pai dinhmun siamṭhat a ni; chutih laiin, MNF sorkarin kum thum chhungin RBI aṭangin Ways and Means hmangin vawi 101 sum a pûk tawh tih a sawi.

Congress sorkar lai, kum 2018-19 financial year-a Mizoram leiba chu cheng vbc. 7.315 a ni tih sawiin Dr Lallianchhunga chuan, "Kum 2018-a MNF sorkar a pian hnuah Mizoram leiba nasa takin a pung a, kum 2022-23 financial year-a Mizoram leibá tura chhût chu cheng vbc. 12,553 a ni tawh a, 58.27% zetin a pung tawh a ni," a ti.

MPCC Media Chairman chuan, Mizoram budget tharah sorkar hnathawk hlawh tur dah chu kum 2021-22 aiin a tlem zawk a, kum 2021-22 ah pawh kum 2020-21 aiin cheng vbc. 202-in a tlem zawk tawh bawk tih sawiin, "Nikumah pawh sorkar hnathawkte'n hlawh an inlâk chhâwk zak zak a, kuminah pawh hian an buai leh hle tura ngaih a ni," a ti a; sorkar hnathawkte hlawh pe ṭha thei lo sorkar a ding chu vanduaithlak an tih thu a sawi.

Dr Lallianchhunga chuan, Mizoram budget tharah siam rem ngai supplementary demand cheng vbc. 6,025.44 a awm tih sawiin, "Hei hi 2021-22 budget aṭanga chhûtin 54.04% a ni. Budget zatve aia tam siam rem ngai a awm hian budget páwn lama sum hman a tamzia a lantir a, thil ṭha lo tak a ni," a ti a; eng emaw avangin budget chu siam rem a ngai ṭhin tih a sawi rualin, siam rem ngai a tam lutuk chuan sum enkawl an thiam lohzia a tichiang hle tih a sawi.

Health Care Scheme (HCS)-ah damlo inenkawlna bill cheng vbc. 40 chuang a awm laiin mi tam takin bill an la thei lo tih sawiin Lallianchhunga chuan, "HCS-a sum indaih lohna chingfel tura hmalakna a awm lo a, HCS hian Finance Minister budget speech-ah hmun a chang pha lo. MNF sorkarin mipui hriselna lam an ngaihthahzia a lang chiang hle," a ti a; HCS sum báwmpui (corpus fund)-ah sum, dah belh turin sorkar an ngen a ni.