Kolasib MJA-ten Aitlang an tlawh

Mizoram Journalists' Association, Kolasib district member-te chuan February 26, Inrinni khan Vairengte tlák lam, Aitlang hmuna Mizoram sorkarin kawng a laih te, Vairengte IOC leh Phaisen inkar kawng laih leh Aitlanga Mizoram police awmna hmunte an tlawh.

Aitlangah hian 5th IR police-in camp pathum leh 3rd MAP-in camp pathum an nei a, Vairengteah base camp neiin, ni 15 danah an inthlak kual ṭhin a ni.

MJA, Kolasib district hian Mizoram sorkarin state ramri ngai pawimawha kawng a siam chu lawmawm an tih thu an sawi rualin, kawng sial tharte chu fûr a thlen hunah lirtheia kal theih a ni dawn loa an hriat thu an sawi a; ramri vengtu police-te bakah, Aitlang leh a chhehvela huan nei tam takin harsatna an tawh dawn avangin ṭhál chhungin blacktop emaw, RCC chhùn emaw tih theih nise an duh thu an sawi bawk.

MJA-te hian Aitlanga Mizoram police duty-na hmun hrang hrang an tlawh a; camp hrang hrangte'n tuiah harsatna an tawh deuh vek bakah, kawlphetha an nei ṭhat loh deuh vek avangin Mizoram sorkarin a rang lamin ngaihtuahsak thei se an duh thu an tarlang.