Union HFW Minister leh CM inkâwm

Union minister of state for Health & Family Welfare Dr Bharati Pravin Pawar chuan February 26, Inrinni khan Mizoram a rawn tlawh a, chief minister Zoramthanga nen an inkawm bakah, RIPANS a tlawh.

Chief Minister nen CM Banglaa an inkawmnaah Mizorama hriselna lam dinhmun tihhmasawn dan tur an sawiho a; CM Zoramthanga chuan, Mizoramin hriselna lama harsatna a neihte leh inenkawlna tihchangtlun a mamawhnate a hrilh a ni.

Zoramthanga chuan, ZMC tihchangtlun belh dan turte leh Mizoramin specialty hospital a mamawhnate a sawi a; Mizoram bakah, state ṭhenawm leh ramri a ṭâwmpui ram pahniha awmte tan pawha ṭangkai thei khawp healthcare service ṭha siam a duh thu a sawi bawk.

Dr Bharati Pravin Pawar chuan, Mizoram chu kawng hrang hrangah hmasawn turin theihna ṭha tak a nei tih a hmuh belh zel thu a sawi a; hriselna tihhmasawn leh inenkawlna tichangtlung turin Mizoram tan theihtawp a chhuah tur thu Chief Minister a hrilh a ni.

Bharati Pravin Pawar hian Inrinni tlai khan Regional Institute of Paramedical and Nursing Sciences (RIPANS) a tlawh a; HFW Ministry-in cheng vbc. 480 a pek hmanga hnathawhte a en bakah, RIPANS hotute nen an inkâwm.

Minister of state for HFW chuan, khawvel pumpuia damdawi lam leh a kaihhnawihah mithiam an indaih loh nasat thu sawiin, Covid-19 léngin indaih lohna a tihzual thu a sawi a; RIPANS tihchangtlunna project chu India hmarchhak tan chhenfâkawm tak a nih a beisei thu sawiin, duhsakna a hlàn a ni.