Christian Hospital-a oxygen plant hawng

Google.org, Program for Appropriate Technology in Health (PATH), USA leh GiveIndia-te'n Christian Hospital, Lunglei Serkawn hnena pressure swing adsorption (PSA) oxygen generation plant (800 LPM) an pek chu February 26, Inrinni khan Health minister Dr R Lalthangliana'n a hawng.

Hawnna inkhawm BCM president Rev.Dr V Laldingliana kaihhruaiah Dr R Lalthangliana chuan, Christian Hospital chu Mizorama damdawi-in hlun ber pakhat a nih thu sawiin, "Baptist Church of Mizoram (BCM)-te'n mipui hmakhua ngaia Covid-19 positive enkawlna hmun changtlung tak Baptist covid care centre (BCCC) an ruahman hi a ropui hle," a ti.

Health Minister chuan, Mizoram chu India ram state zingah Covid swab test titam ber zinga mi a nia sawiin, "Mizoram population aṭanga chhût chuan 160% chuang a ni a, kan positivity rate 11% vel a ni. Testing kan tih tam avangin positivity rate pawh hi a sang lo thei lo," a ti a; Covid-19 vanga thi zat chu India ramah a hniam ber zinga mi a nih thu a sawi.

PSA oxygen generation plant hian minute khatah oxygen litre 800 a siam chhuak thei a, khawl hi cheng nuai 150 man a ni.

Khawl bunna tur siam nan leh senso ṭul dang atan BCM-in cheng nuai 23 an tum a, South Tuipui, Lunglei North, Lunglei West, Lunglei East leh Lunglei South bialtu MLA-te'n MLA fund aṭangin cheng nuai 20 an thawh bawk.