MNF sorkarah dikna nèk sâwr mek zel a nihzia chiang takin a lang - ZPM

ZPM chuan, chief minister Zoramthanga'n dan loa scheduled tribe certificate nei Kamrul-a contract hna leh Khawzawl-Ngaizawl kawng siamnaa hming lang Assembly speaker Lalrinliana Sailo-te thlavang hauha contract hna inpek a sawifiah dan chu mak an tih thu an sawi a, "MNF sorkarah hian dikna nèk sâwr mek zel a nihzia chiang takin a lang," an ti.

ZPM party chuan February 25, 2022 khan thuchhuah siamin, CM Zoramthanga'n February 24-a press conference a neihnaah Kamrul-a'n dan loa ST certificate neia contract hna eng emaw zat a hmuh leh Khawzawl-Ngaizawl kawng siam chungchanga hming lang Lalrinliana Sailo te chungchang a sawi dan chu, "Sum duh luatah hnam pawi nasa taka khawih mektute mawi leh mawi lo pawh ngaihtuah loin insawifiah leh sawi fihlîm tum záwng ringawta hma an la ta mai hi pawi kan ti tak zet a ni," an ti.

Sorkar kalphung pangngai awm sa bawhchhe mektu, mi hming hawha contract hna thawh mek tam tak MNF sorkarah a awm ngei tih CM thusawi aṭangin a chiang tih sawiin ZPM chuan, "Siam ṭhat tuma hmalakna a awm kan beisei laia CM meuh anmahni thlavâng hauh zawnga a ṭawng chhuak hi ram tana ṭha tur ngaihtuah aia mahni pumpui hma chauh ngaiin ram rorelna a kalpui mek a ni tih chiang takin a tarlang," an ti a; contract hnaah dan kalha thil tih - mi hming hawha contract hna thawh a awm ngei a ni tih a lang chiang tih an sawi a ni.