December 2018 hnuah Health department hnuaiah Restricted tender-in hna 25 pe tawh
Kum thum leh thla khat chhung, December 2018 aṭanga December 2021 thlengin Health & Family Welfare department hnuaiah restricted tender hmangin hna 25 pek a ni tawh.
Assembly session neih mekah February 23, 2022 khan HFW minister Dr R Lalthangliana chuan INC member Zodintluanga Ralte zawhna ziaka chhangin, December 2018 aṭanga December 2021 thlengin restricted tender hmangin Directorate of Health Services hnuaiah hna 15, Hospital & Medical Education leh Zoram Medical College hnuaiah hna pathum ve ve leh, Mizoram State Health Care Scheme hnuaiah hna pali pek a nih thu a tarlang.
DHME hnuaia hna pekte chu damdawi-in ṭhenkhata medical gas pipeline supply leh bun hna niin, Rs 2,65,00,000 ruahman a ni a; DCHC atana Kulikawn Hospital buatsaihna atan Rs 5,00,700 ruahman a ni bawk. Oxygen atana medical gases cylinder atana hna pek erawh sum zat tur hriat a la ni lo.
MSHCS hnuaia restricted tender-a hna pekte chu leaflet, enrolment form, receipt leh manual-te printing press-a print tirna man a ni tlangpui.
Hetih lai hian, IWR minister C Lalrinsanga chuan Zodintluanga zawhna ziaka chhangin, IWR department hnuaiah December 2018 leh December 2021 inkarah tender chhuah loa hna pek a awm loh thu a tarlang.