MZU Southern Campus atan central-ah DPR cheng vbc. 400 thehluh a ni tawh - HTE Minister

Commerce & Industries minister Dr R Lalthangliana chuan February 26, Inrinni khan Lunglei Electric Vengah NABARD sum nuai 1,082.93 sênga ruahman Agri-Marketing & Training Infrastructure (AMTI) building a hawng. Minister chuan, MZU Southern Campus atan sorkar laipuiah DPR cheng vbc. 400 thehluh tawh a nih thu a sawi.

Dr R Lalthangliana chuan, AMTI chu Lunglei khawpuia hmasawnna ruhrel lian tham, khawtlang tana chhenfâkawm leh eizawnna kawnga ṭangkai taka hman theih tur a nih thu sawiin, "NEC aṭangin Lunglei supermarket sakna tur cheng nuai 1,400 sanction hmuh a ni a, Bangladesh ram nena kan insumdawn tawnna atana ruahman Kawrpuichhuaha integrated check post (ICP), Tlabung tihlawhtling turin department chuan theihtawp a chhuah mek zel," a ti.

MZU Southern Campus atan sorkar laipuiah DPR cheng vbc. 400 an thehluh tawh thu sawiin Minister chuan, "Chak taka bawhzui mek a ni a, hman lailawk tur Engineering College building chei ṭhat hna pawh thawh mek a ni," a ti.

Civil Hospital, Lungleia Trauma Centre sak pawh zawh thuai beisei a nih thu te, NEC sum nuai 300 hmanga Multipurpose Laboratory building ruahman mek pawh 2023 tir lamah zawh beisei a nih thute a sawi bawk.