Sorkarin NHM sum táng a awm lo niin a sawi

National Health Mission (NHM), Mizoram hnuaia thawkte hlawh chungchangah Mizoram sorkar chuan February 26, Inrinni khan thuchhuah a siam a; tun kar chhungin Treasury-ah bill thehluh tura ruahman a nih thu leh Treasury-ah NHM sum táng a awm loh thu a tarlang.

Sorkar thuchhuah chuan, NHM hnuaia thawkte hlawh chu NHM sum-sorkar laipui aṭanga dawn leh pek ṭhin a nih thu a tarlang a, "Kumin bikah hian sorkar laipuiin centrally sponsored scheme (CSS) fund release dan thar a siam avangin first instalment hi tun hnaiah dawn chauh a ni," a ti.

Sorkar laipui aṭanga sum hmuh chu public financial management system (PFMS) kaltlangin state nodal account-ah chhûn luh a ngai tih tarlangin, "Chutianga ti tur chuan tih ngai tam tak a awm a, chungte chu Mizoram lama thawktute'n theihtawp chhuaha an tihfel vek tawh hnuah, technical problem pakhat Delhi headquarters aṭanga chinfel ngai a awm a ni," a ti a, chu chu siamṭhat a nih tawh thu a tarlang.

NHM-a thawkte hlawh tur chu dan thar angin tun karah Treasury-ah thehluh theih tura ruahman a nih thu te, bill thehluh a nih veleh Treasury aṭanga pe chhuak turin NHM leh Finance department hotute'n an sawiho vek tawh thu te, first instalment chu tun hnaiah dawn chauh ni mah se, Finance department leh NHM lam hotute ruahmannain November 2021 thleng hlawh pek lâwk tawh a nih thu leh, tun dinhmunah Treasury-ah NHM sum táng a awm loh thute an tarlang bawk.