KHAWTHLIR
Thisen pe
February 26, Inrinni khan KṬP, Bethlehem Branch chuan KṬP Day pual leh an branch din champha pualin an kohhran hall-ah thisen pek an huaihawt a, Synod Hospital tan thisen unit 41 pein, petute mipa 31 leh hmeichhia 10 an ni. ṬKP, Ramhlun Bial pawhin Aizawl Civil Hospital tan thisen unit 34 an pe a, petute mipa 31 leh hmeichhia pathum an ni.
Consultancy firm 243 a awm
Finance changtu chief minister Zoramthanga'n ZPM member Vanlalhlana zawhna ziaka a chhan danin, Mizoramah consultancy firm 243 a awm. Consultancy firm-te chu chi thum a awm a, detailed project report (DPR) siam leh project supervision-ah firm 97, project development & construction work-ah firm 134 leh IT project lamah firm 12 a awm a ni.
Architect 93 awm
Commerce and Industries minister Dr R Lalthangliana chuan February 23, 2022 khan ZPM member Lalduhoma zawhna ziaka chhangin, Architects Act, 1972 hnuaiah Mizoram sorkara registration nei architect 93 an awm a, mimal 86 leh firm pasarih an ni.
Auto-rickshaw Permit 1,107 pe
Transport minister TJ Lalnuntluanga chuan Assembly session-ah ZPM member Lalduhoma zawhna ziaka chhangin, kum 2019 aṭanga tun thlengin auto-rickshaw permit 1,107 pek chhuah a nih thu a tarlang. Transport Minister tarlan danin, kum tina auto-rickshaw permit pek dan chu - kum 2019-ah 517, kum 2020-ah 230 leh 2021-ah 360 a ni a; permit pek a nih dawnin pekna hmun tura Auto-Rickshaw Drivers Union-te ràwn an ni ngai lo.
Journalist pension
IPR minister Lalruatkima chuan February 25 khan ZPM member VL Zaithanzama zawhna ziaka chhangin, journalist pension scheme chu sorkarin a ngaihtuah mek a, pek hun tur sawi theih a la nih loh thu Assembly House a hrilh.
Minister-in tlawh
Environment, Forests & Climate Change (EFCC) minister TJ Lalnuntluanga chuan February 26, Inrinni khan Bethlehem Vengthlanga mau leh hnáng zirbingna hmun, Forest Research Centre for Bamboo & Rattan a tlawh. Minister hian mihring thiamna hmanga naubán tihpunna, Artificial Pollination of Orchids chungchanga DVD an siam a tlangzarh nghal a ni.
MLA-in hawng
Aizawl South-II bialtu MLA Lalchhuanthanga chuan February 26, Inrinni khan a bial chhung, ITI Veng YMA Vanapa Section property house Vanapa Rûn a hawng. Aizawl South-I bialtu MLA C Lalsawivunga pawhin February 25, 2022 khan a bial chhung Republic Vengthlanga stroke leh alzheimer vanga khumbeta awm mi pakhat hnenah wheelchair a pe bawk.
Khawl pho chhuak
Mizoram Science Centre chuan tun hnai khan Berawtlanga an hmunah Polar Satellite Launch Vehicle (PSLV C31) leh Radio Controlled Model Airplane te mipui en theih turin a pho chhuak a, Directorate of Science & Technology chief scientific officer H Lalsawmliana'n a hmanpui a ni.