February-ah hripui vei mi 38,096 hmu tawh

Mizoramah Covid-19 vei February 25, Zirtawpni khan mi 907 leh February 26, Inrinni khan mi 901 hmuh chhuah a ni a, February thla chhungin mi 38,096 hmuh a ni tawh. Inrinni leh nimin khan hripui vei dam tawh mi 1,947 chhuahtir an ni.

Covid-19 vei February 25-a hmuh tharte chu mipa 396 leh hmeichhia 511 an ni a; RT-PCR hmanga hmuh 84, TrueNAT hmanga hmuh 45, RAT hmanga hmuh 748 leh FIA hmanga hmuh 20 niin, positivity rate chu 21.10% a ni.

February 26-a hmuh tharte chu RT-PCR hmanga hmuh 85, TrueNAT hmanga hmuh 29, RAT hmanga hmuh 765 leh FIA hmanga hmuh 22 an ni a, positivity rate 28.41% a tling.

Mizorama positivity rate chu ni 36 chhung a záwnin Covid-19 positivity rate 20% chung lam a ni tawh; January 22, 2022 aṭang khan ni tin positivity rate 20% aia sang vek a ni.

Nimin tlai dar 5 thleng khan hripui vei dam tawh mi 1,408 chhuahtir an ni a, nimin khan mi 539 chhuahtir an ni bawk.

IDSP record angin, Mizoramah Covid-19 vei 2,13,117 hmuh chhuah a ni tawh a, mipa 99,650 leh hmeichhia 1,13,467 an ni a, mipa aiin hmeichhia 13,817-in an tam zawk. Nimin tlai dar 5 thleng khan mi 2,05,403 (96.38%) chhuahtir an ni tawh a, mi 656 (0.31%) thi tawhin, enkawl mek mi 7,058 (3.31%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,13,117 chu mi 1,000 zelah hripui vei mi 194 an awm ang a ni a; mi 1,00,000 zela Covid-19 vangin mi 59 an thi tawh ang a ni tih sorkar thuchhuakin a tarlang.