Hripui vei hmuh thar 48 zingah Mizorama kái mi 39 an awm
November 16, Thawhṭannia Covid-19 vei hmuh chhuah mi 48 zingah Mizoram chhunga kái chhâwng mi 39 an awm a, an zingah nausén thla 2 mi a tel.
Sorkar thuchhuaha a lan danin, tualchhunga hripui káite chu Aizawl khawpuia veng 13-a mite leh Aizawl páwn lam khaw pathum - Lunglei, Champhai leh Lawngtlaia mite an ni a; Lawngtlaiah hian mi 12 an awm.
Tualchhunga hri kái mi 39 zingah kài ṭanna hriat loh mi paruk leh natna lang chhuak (symptom nei) mi 10 an awm a; sample test result tihchhuah laia chanchin kimchang la hriat loh mi pakhat a awm bawk.
Ramhlun Vengthara Covid-19 positive hmuh chhuah thar pakhat chu hmeichhia thla 2 mi a ni a; a nuin hripui a vei vanga enkawlna hmun, Durtlang BSUP CCC-a awm ve a ni.