Electoral roll-a rualbanlo 3,915-te Vote thlak theih dan tur ngaihtuah
Mizoram electoral roll-ah pianphunga rualbanlo inziak lut mi 3,915 an awm mek a, Election Commission of India (ECI) ruahmannain Mizoram Election dept. chuan rualbanlote'n vote an thlak theih dan tur an ngaihtuah a, ruahmanna hrang hrang an siam a ni.
Aizawl district chhunga inthlan kaihhnawiha sorkar official-te tan nimin khan NLUP conference hall-ah rualbanlote'n vote an thlak ngei theih dan tur zirhona, 'Workshop and sensitization on Accessible Elections for Persons with Disabilities’ buatsaih a ni.
Additional chief electoral officer (CEO) Lalzarmawii chuan, India chu democracy a nih angin, mipui aiawh tur thlannaah khua leh tui kum 18 chin chung lam, pianphunga rualbanlote leh kawng danga vanduaite pawh vote thlak vek tura beisei an nih thu a sawi a, "Vanduaina hi tu chungah pawh thleng thei a ni tih hre reng a, rualbanlote chungah ngilneihna leh hriatthiamna lantir hi kan tih tur dik tak a ni," a ti.
Mizoram chhungah electoral roll-ah pianphunga rualbanlo inziak lut (enroll) zat chu mi 3,915 an nih thu sawiin Additional CEO chuan, "Chu'ngte chu mitdel/mit lam ṭha lo mi 303, bengngawng/beng lama harsatna nei mi 1,318, zeng/chet lam harsat nei mi 738 leh rualbanlohna chi dang nei mi 1,556 an ni," a ti a; electoral roll-a awm zawng zawngte'n vote an thlak ṭheuh chu ram khua leh tuite chanvo a nih thu a sawi.
Workshop kaihruaitu deputy CEO H Lianzela chuan, inthlanah pianphunga rualbanlote chungchangah kum tam sorkar leh mipui pawh an lo muthlu tih sawiin, "Tunah erawh chuan anmahni ngaih pawimawhna leh awlsam zawka vote an thlak theihna turin ruahmanna hrang hrang siam zel a ni," a ti.
Inthlan kaihhnawiha official kalkhawmte hi assistant CEO Malsawmzuala leh SWD assistant director Chuauzikpuii ten thil pawimawh hrang hrang an zirtir a ni. District hrang hrangah pawh rualbanlote'n vote an thlak ngei theihna hian official-te pualin training buatsaih ṭhin a ni a, polling station-te pawh rualbanlote vote thlak theihna tura cheibawl a ni.