Nationalism zirhona seminar buatsaih
Art & Culture department bultumin Mizo Academy of Letters (MAL) chuan nimin khan Economics & Statistics, conference hall-ah 'Seminar on Nationalism in Mizo Literature' an buatsaih a, chief information commissioner (CIC) Lalduhthlana Ralte-in a hmanpui.
Lalduhthlana Ralte chuan, nationalism chu Mizo tan a pawimawh hlea a hriat thu sawiin, "Mizo nationalism hi páwn lam aṭanga kan thlir hian a dang deuh em aw tih cháng ka nei ṭhin. Hun tam zawk Mizoram páwna hmang ka ni a, nationalism hi kan hman danah ram leh hnam kan huamtir avang hian kan buai deuh em aw tih ngaihtuahna pawh ka nei fo ṭhin," a ti.
Nationalism chu hnam thinlung anga sawi chuan, thinlung pawh inen nawn fo a ngai dawn nia a hriat thu sawiin Lalduhthlana Ralte chuan, "Nationalism leh patriotism hi kan lâk kawp chuan kan buai dawn a, kan insáwr zìm lutuk chuan keimahni ngei pawh hi kan la buai thei ang," a ti a; cosmopolitanism lam zawngin khawvel a kal nasa hle tawh mai a, nationlism ngaihtuah ṭhat a ṭul thu a sawi.
Lalduhthlana Ralte chuan, Mizo ṭawng leh sakhua chu Mizote Mizo nihtirtu ber pakhat a nih thu sawiin, "Kan ṭawng leh sakhua hi a ral chuan kan Mizona hi a ral mai dawn. Thuhnuairawlhnate leh tlawmngaihnate hi nationalism min petu pawimawh tak a nih avangin, chhawm nung zel turin ṭan kan lak a ngai," a ti.
MAL hruaitute chuan, seminar hi inthlanpui a hnaih tawh vanga huaihawt a nih loh thu leh hun rei tak aṭang tawha nei tura ruahmanna siam tawh an nih thu an sawi.
Seminar-ah hian mithiam hrang hrang sawm bikte'n paper an buatsaih zirho a ni a, MAL member, college zirlai, ICFAI University leh Mizoram University-a Mizo zirlaite an tel a ni.