INC-in candidate an puang kim Palak bial vangin MADC MDC 6 an lungawi lo

All India Congress Committee (AICC) general secretary Mukul Wasnik chuan October 24, Nilaini khan press release siamin, Mizoram chhim lama Assembly constituency pali - West Tuipui, Tuichawng, Siaha leh Palak biala Congress party candidate turte a puang. Mara Autonomous District Council (MADC) parukte chu candidate puanah hian an lungawi lo.

AICC general secertary, Central Election Committee changtu Mukul Wasnik-a'n press release a siama a tarlan danin, bial palia Congress party candidate turte chu - West Tuipui bialah Nihar Kanti Chakma, Tuichawngah Amit Kumar Chakma, Siaha-ah S Hiato leh Palakah Hiphei te an ni.

Congress party hian October 11, 2018-a Lal Thanhawla Auditorium-a an candidate turte an puan rualin West Tuipui, Tuichawng, Siaha leh Palak biala an candidate turte an puang ve nghal lo a; October 24 khan New Delhi aṭangin AICC hotute'n an puansak ta a ni.

Hetih lai hian, MADC huam chhunga Palak Assembly consti­tuency huam chhunga Congress party MDC 11 zinga MDC parukte chu an biala INC candidate turah an lungawi lo. MDC parukte chuan Palak biala ding tur hian Hiphei aiin K Riachho an duh zawk a, he mi chungchang hi MPCC hotute pawh an lo hriattir tawh nia thu dawn a ni.

Vanglaini palai zawhna chhangin MDC-te chuan, official-a MPCC Nomination Committee-in candidate an puan leh hma chuan an kal dan tur an la hriat loh thu an sawi a, "Official-a puan a nih hnuah kan kal zel dan tur kan rel ang. K Riachho dah a nih loh chuan kan lungawi dawn lo tih an hre sa vek a ni," a ti.

Hetih lai hian, MPCC Nomi­nation Committee chuan, AICC-in candidate pali an puante chungchang hi nimin khan an ngaihtuah nghal a, he thuziah lai hian an pawmpui dawn leh dawn loh kan hre hman lo.

MDC seat 25 awmna MADC inthlan hnuhnung ber, May 2017-a neihah Congress party-in seat 17 an la a, MNF leh MDF ṭang dunin seat pasarih an la. Nikum kum tawp lam khan MDF chu BJP-ah an inchhûng lut tawh thung.