Hnahthialah Walk for Education neih a ni

Hnahthial Teachers' Association (HTA) chuan, nimin khan Hnahthialah Walk for Education an huaihawt a, Hnahthiala sikul hrang hranga zirlaite'n kawng an zawh.

Walk for Education-ah hian Hnahthial chhim lama sikulte'n Nauhruaikâwn aṭangin Bazar kâwn thleng kawng an zawh a, Hnahthial hmar lama sikulte;n BRTF Canteen kawt aṭangin Bazar kâwn thleng an kal a; Bazar kâwnah an intâwk khawm a ni.

Bazar kâwna an intawh khawmnaah HTA president Lallianṭhuama chuan thu sawiin, zirna chu hmasawnna bulpui a nih avangin, Hnahthial khawtlangah leh MIzoramah nasa zawka zirna uar a nih theihna tur leh, zirlaite'n nasa zawka an zir theih nan Walk for Education an huaihawt tih a sawi a, "Zrlai naupang duhawm tak takte hi kan ram leh hnam chhan turin in pawimawh a, zirna hmangin kan ram leh hnam kan chhan tur a ni," a ti.

Zirlaite'n kawng zawh paha 'Save Mizoram Through Education' tih thuziak an kente chu hre reng tura chahin Lallianṭhuama chuan, "Zirna hmangin Mizoram hi kan chhanhim thei a ni tih hre reng ila, Hnahthial khawtlang pawh hma kan sawn mek laiin, zirna kawngah kan hnufual deuh em aw a tih theih. Naupangte'n zirna hi hmasawnna a ni tih kan chian chuan, nakinah mi ropui tak kan ni dawn a ni tih kan hriat a pawimawh," a ti a; zirlaite chu nasa taka zir a, miropui tak an ni thei tih hre reng turin a fuih.

HTA President chuan, ṭhang-tharte'n zirna hmanga an tih turte an tih loh chuan hnam dangin awlsam takin Mizote an chîmral thei tih a sawi a; Mizote zingah all India service (central service)-a inziak tling thei an tlem ta hle tih sawiin, "Kum 2013-a tlingte kha kan la chhunzawm leh ta miah lo a, kum 5 lai a liam leh ta. Hnahthial khuaa zirlaite hian all India service-a lut thei turin lehkha zir tak tak a ṭul. Mobile phone-te hi ngainat viau loh tur a ni a, kan zirlai min tichhe theitu a ni," a ti.