Congress-in MPF leh party-te Thuthlung Samlukhaia an bawhchhiat thu puangzar
Mizoram People Forum (MPF) Aizawl South-III Constituency Forum chuan Aizawl South-III biala Samlukhai khuaah Congress party-in MPF leh political party-te Thawhhona Thuthlung an bawhchhiah thu an puang.
MPF-in 'Thawhhona Thuthlung bawhchhia puanzarna' tih thu an chhuahah hian MPF Aizawl South-III president Rev. F Lalhmingthanga leh secretary Upa F Lalhmangaiha ten hming an ziak a; tun hnuah chuan Thuthlung bawhchhiatna awm tawh lo se an duh thu an tarlang.
Aizawl South-III MPF chuan, Aizawl South-III Congress Block-II chuan October 23, Thawhlehni khan Samlukhai khuaah sial pakhat leh vawk pathum talhin ruai an ṭheh tih sawiin, chu chu MPF leh political party-te Thuthlung bung 2:4 bawhchhiatna a nih thu an tarlang a, "Ruai an ṭheh hma October 20, Inrinni-ah MPC Constituency Vice President pawhin ti lo turin a lo ngen tawh a; heti chung pawha ruai an ṭheh lui hi pawi kan ti tak zet a ni," an ti.
MPF chuan, Thawhhona Thuthlung bung 8:2-ah, 'Heng Thawhhona Thuthlung hi bawhchhia an lo awm a, finfiah ngei a nih chuan, MPF-in an bawhchhiatna constituency/area huam chhungah a puangzar ang,' tih a nih avangin, Aizawl South-III Congress Block-II ten Thuthlung an bawhchhiat thu chu an puangzar ta tih an tarlang a ni.