Mipuite hmasawnna atan ṭan kan la dawn - Dr. Thangtea

Aizawl South-II MNF Block chuan nimin khan Kulikawn YMA Hall-ah khawmpui an hmang a, an hun hmanpuitu MNF vice president Dr. R Lalthangliana chuan sorkarna an chan chuan mipuite hmasawnna atan ṭan an lak tur thu a sawi.

Dr. R Lalthangliana chuan Mizoram hmasawnna tur SEDP hnuaiah ruahmanna an siam vek tawh tih sawiin, "Thuneihna kan chan chuan hmeichhiate dinhmun chawikang tura hmalak a ni dawn. Kawng hrang hrang­a mipuite'n hma an sawn theihna atan ṭan kan la dawn a ni," a ti.

Mizoram boruak leh mipui sukthlek aṭangin MNF-in sorkar turin hun ṭha an nei tih a lan chian thu sawiin MNF Vice President chuan, "Aizawl South II hi MNF pian chhuahna hmun a ni khatihlai khan Tuikhuahtlanga Pu Lal­denga in-ah khawvel ngaiah miropui ni lo te te kalkhawmin MNF hi an din a ni," a ti a, Aizawl South II chu MNF din chhuah lehna atana bulṭanna a nih dawn thu a sawi.

Thusawitu dang, MNF general secretary Lalruatkima chuan MNF chu Pathian leh kan ram tan titu party an nih angin, hnam pasalṭhate an hriatreng thu sawiin, "Hnam pasalṭhate tan thil tih theih nei tam lo mah se, kan party chuan an inpeknate a ngaihlu hle. Hun kal tawhah an tu leh fate leh an nupui fanaute kan lo ngaihsak tawk lo deuh a nih pawhin ngaihdam ka dil a, tun hnu zelah chuan an tan tih theih kan nei a nih chuan theihtawp chhuah kan in huam," a ti.

Inkhawm hi block president Vanlalrengpuii'n kai­hruaiin, Aizawl South-II-a MNF candidate Denghmingthanga chuan an party-ah mi thar eng emaw zat a lawm lut.