North-I MLA-in kawng sial a enfiah

Aizawl North-I bialtu MLA Vanlal­hlana chuan MLA fund hmanga a bial chhung Upa Biaka Road, Durtlang Kawnveng Welfare-te'n MC Hall Durtlang - Zuangtui kawng pawhna tur kawng sial hna an thawh mek chu nimin khan a tlawh a; Mizoram sorkar chu central aṭanga sum hmuh a hmannate mipui hriata puangzar tura a ngen thu a sawi.

Covid-19 hripui léng vanga khawsak harsa zawkte inhlawhna atan a MLA fund hmangin kawng siam hna chu thawh a nih thu sawiin Vanlalhlana chuan, "Hri léng do nan MLA fund aṭangin sum eng emaw zat CM Relief Fund-ah kan thawh avangin duh angin bial chhung hmasawnna hna thawh theih a ni lo," a ti.

Vanlalhlana chuan, North Eastern Council aṭanga cheng nuai 300 leh DoNER aṭanga damdawi lam hmanraw leina tur cheng nuai 1,616, Mizoram sorkarin a dawn tawhte chu a hmanna mipui hriata puang tura sorkar a ngen thu a sawi bawk.

MLA Vanlalhlana hian ZPM Bawngkawn Unit III-ah ZONU (Women Wing) dinna hun a hmanpui nghal a ni.