Vai chunga rorelna lek turin phût

ZPM Ṭhalai chuan nimin khan thuchhuah siamin, sorkarin vai man turin Mizoram police-te kut a phuar em ni, an ti a; Mizo chungah chauh ni lo, vai chungah pawh rorelna lek turin sorkar an phût thu an tarlang.

Buichali, Sairang bulah Raju-a truck MZ-05A 3067 lo tiding a, a balu phurh Sairang Driver's Union-te'n an bun luihtir lai video WhatsApp-a darh kaihhnawihah police-te'n mi 15 an man thu sawiin ZPM Ṭhalai chuan, "Police-te'n kan Mizo driver-te awlsam taka an man zung zung theih laia Thinghlun khuaa thlám leh thlai tam tak tichhetu man an la ni lo erawh a hrilhhaithlak kan ti," an ti. Thil sual ti lai video finfiahna ṭha tak a awm reng laia man an ni ve lo chu vai hlauh vangah an puh.

ZPM Ṭhalai chuan, Home Minister chu Mizote chauh ni loin, dan bawhchhetu an nih chuan vai pawh man an nih theihna tura hma la ngam turin an ngen a, "Mizoram sorkar hian a kuta dan awmte a ngam záwngte chungah chauh lek lo a, dan palzúttu vai lakah pawh lek ve turin kan phût a ni," an ti.