Balu buntirtu mi 15 man an ni

Sairang Drivers Union member intite'n Buichali, Sairang bulah truck MZ-05A 3067-in balu a phurh kawngpui sira an bun luihtir kaihhnawihah police-te'n mi 15 an man tawh thu, Mizoram Police chuan thuchhuah siamin an tarlang.

Mizoram Police thuchhuah chuan, remna leh muanna tichhe thei zawnga che lo tur leh mahni kuta dan leh thupekte kenkawh tum lo turin mipui an ngen.

Police thuchhuah tarlan danin, November 15, 2020 zanah balu bun luihtir lai video chu WhatsApp-ah a darh a, chumi kaihhnawihah chuan IPC Section 34, 341, 427 leh 506 hnuaiah Sairang Police Station-ah thubuai ziah luh a ni. Inhnamhnawiha puh mi 15 man an ni tawh a, bail theih thubuai a nih avangin an vaiin bail-a chhuahtir an ni.

Chhui zuina aṭanga a lan danin, thil thlengah hian lirthei tihchhiat a awm lo a, truck khalhtute pawh zan dar 10:30 velah kaltir leh nghal an ni.