CADC-a BJP nen kan thawhhona Vawiin aṭangin a tâwp - Hawla

Mizoram Pradesh Congress Committee (MPCC) president Lal Thanhawla chuan, nimin (October 26) aṭang khan Chakma Autonomous District Council (CADC)-a Congress party-in sorkarna an siampui Bharatya Janata Party (BJP) nena an thawhhona tihtawp a nih thu a puang.

Nimina Congress Bhavan-a thu a sawinaah Lal Thanhawla chuan, an party-in ṭum dang angin CADC inthlan hnuhnung berah an tih ṭhat vak loh thu a sawi a, "Chuvangin, BJP-in thawhpuiah min sáwm a, BJP ticket-a thlan tlinte hi Congress hlui deuh vek an ni. 'Sorkarna siam ho ila, nakinah kan lo lut leh mai dawn a lawm' an ti a, an lo lut leh ta mai si lo a, vawiin aṭangin kan thawhhona a tawp nghal a ni," a ti.

MPCC President chuan, thawh­hona an tihtawp hma pawhin MDC paruk vel an bàn tawh thu sawiin, "A ṭhen bànna an pawm a, a ṭhen bànna an pawm lo. Chutiang vel mai mai nena inkhualtelem chu kan duh lo a, thawhhona kan titawp a ni," a ti a; BJP MDC-te'n an sawi anga Congress an zawm leh si loh avangin, BJP chuan Congress an bum niin a sawi.

Hetih lai hian, MPCC trea­surer H Liansailova leh minister Lalsawta te pawhin nimin khan Aizawl Press Club-a thuthar thehdarhtute an kawmnaah BJP chu Mizoram leh Mizote tan an hlauhawm hle thu leh, an lakah Mizo mipui an fimkhur tak zet a ngaih thu an sawi.

H Liansailova chuan, tun ṭuma Mizoram inthlan a pawi­mawh zualna chu - sorkar laipuia thuneihna chang mek BJP an lan tak vang a nih thu sawiin, "Min chîmtu dang an awm tawh. BJP thil tih dan kan hria a, kan fimkhur a ngai. Local party hmanruaah an hmang thiam hle a, kan culture, sakhuaahte rúntu lian tak kan nei ta a ni," a ti.

Mizoram sorkara Finance minister ni lai Lalsawta pawhin, BJP chuan Mizorama BJP hmang kher lo pawhin Mizoramah bu an khuar hlauh chuan Mizoram leh mipui tan kumkhaw chawr lohna a ni thei niin a sawi a, "BJP-te hi anmahni chauh chuan an sorkar thei lo tih an inhre chiang a, he laia sorkar ve mai theia an ngaihte thawhpui an tum a, an thunun theih sorkar kan nei ang tih a hlauhawm tak zet a ni," tiin, Mizoram mipuite fimkhur turin a chah.

Congress party hruaitute'n BJP an hlauhawm thu an sawi ṭhin laiin, CADC-ah Congress leh BJP-in sorkar inṭâwm an siam mek chungchang zawhna chhángin MPCC treasurer H Liansailova chuan, sorkar inṭâwm an siam mek chu an tualchhung (CADC area)-a an lo inremsiamna a nih thu a sawi a, "Tuna CADC-a kan thawhhona hi sût tumin kan houte'n an buaipui mek a ni," a ti.

CADC inthlan hnuhnung ber April 2017-a neihah seat 20 awmah MNF-in seat 8, Indian National Congress (INC)-in seat 7 leh BJP-in seat 5 an la a, INC leh BJP thawkdunin sorkarna an siam a ni.