Mi firfiakte'n Mizo sipai an kâp hlum

October 25, Ningani zan dar 9 vel khan Jammu & Kashmir-a Tral bial chhunga Luragam-ah mi firfiak, Jaish-e-Mohammed pawl nia hriatte'n 42 Rashtriya Rifles sipai camp an bei a, Mizo sipai Ngamsiamliana s/o K Imanuela, Rengtekawn, Kolasib district chu an kâp hlum.

Thu dawn danin, mi firfiakte hian sipai camp hi silai kâp hla chi hmangin an ràl-sài a, camp-a guard duty-a awm mek Ngamsiamliana chu a lú-ah kâp fuhin, a hmunah a thi nghal a; sipai dang pakhat a hliam bawk. Sipaite pawhin mi firfiakte chu an kâp lêt a, nasa takin inkâp mah se, thi leh hliam dang an awm hriat a ni lo.

Vanglaini palai zawhna chhanga Rengtekawn Branch YMA president Lalkhawmliana sawi danin, Ngamsiamliana hi kum 23 mi a ni a, kum 2013-ah Assam Regiment-ah a lut a; a ruang rawn thlen hun tur hriat a ni rih lo.

Indian Army-ah hian a hranpain Rashtriya Rifles tur bika lak an awm lo a, regiment hrang hranga mite chu pawt khawmin, Rashtriya Rifles-ah hian hun eng emaw ti chhung atan an awm ve ṭhin tih sipai aṭanga châwl tawhte chuan an sawi.