ZPM kan sorkar chuan minister bathlarah eizawn a ngai tawh lo ang - K Sapdanga

Zoram Peoples Movement (ZPM) leader, Aizawl East-I biala ding tur K Sapdanga chuan sorkarna an chan chuan minister bathlarah eizawn a ngaih tawh dawn loh thu sawiin, "Khaw­pui aṭangin thingtlangah hnathawk turin mi an lut ruih ruih ang," a ti.

K Sapdanga hian nimin khan Aizawl East-I ZPM South Block pisa-a mithar lawmna puala inkhawm buatsaihah thu sawiin, "Pathian zarah sorkarna kan chang a nih chuan minister bathlara eizawn ngai tawh loin, tuthlawh humin mahni leipuiah te, mahni huanahte hna thawk turin kan liam sung sung dawn a ni. Ram hmasawn reng rengah khawpui a thawl ṭhin a, thingtlangah mi thlamuang takin an awm ṭhin," a ti a, ZPM a sorkar anih chuan khawpui aṭangin thingtlangah hnathawk turin mi an lut ruih ruih ang a, khawpui a thawl tur thu a sawi.

Tun dinhmunah chuan India ram pumah Aizawl khawpui hi thingtlang pan khawm tam berna khawpui a nih thu sawiin ZPM Leader chuan, "A chhan chu ram rorelnain chutiang chu a tinzawn vang a ni. Kuthnathawh hlamchhiah a ni a, thingtlang khawsak hlam chhiah a ni. Kuthnathawktute pawhin an hnathawhna ram hlam chhiahin, man chawiin mi in an luah a, naktukah khawiah nge ka inhlawh ang tih an ngaihtuah a ngai a ni," a ti.

K Sapdanga chuan party ṭhenkhat chuan hausa sorkar din tumin theihtawpin ṭan an lak thu sawiin, "Aizawl East -I bial hi mi hausa sorkar awp atan kan phal loa, chuvangin miretheite, nitin a inhlawhfa ṭhin te leh huan nei te, kuthnathawktute behchhanin mihausa sorkar din tum tute hi kan namthlu ngei ang tih ka ring tlat. MNF chuan sorkarna an siam thei a nih pawhin Chief Minister tur midang an zawn a ngai ang," a ti a, MNF President chuAizawl East-I mipuite'n thlan tlin an tum loh thu a sawi.

Lawmluhte zinga thusawitu Zemabawk MNYF president Lal­ram­mawia chuan MNF leh Congress chu phuba inlak tawn tum ringawta khawsa nia a hriat thu sawiin, "ZPM hi Pathian leh mipuite duh dana rorel tum nia ka hriat avangin ZPM-ah ka rawn lut a ni," a ti.