MNF President-in chhimthlang bial a fang

MNF president Zoramthanga chuan tun kar chhung khan Mizoram chhim-thlang lam, Thorang, West Tuipui leh Tuichawng bial chhunga khaw ṭhenkhatte a tlawh a; MNF-in sorkarna a siam hunah Khawthlangtuipui hmangin Tlabung bulah India leh Bangladesh inkalpawh tawnna tur ṭha zawk an siam dawn thu a sawi.

Zoramthanga hian October 25, Ningani khan Nunsury-ah MNF West Tuipui Block Joint Block Conference a hmanpui a; Congress party dinhmun a ṭha lo tial tial a, MNF zawm thar an pung zel nia sawiin, "India ram hmun tinah Congress party an tlachhe tial tial. Mizorama Congress party hi khàwnvàra a phitá ni ta se, Delhi-a Congress chu khawnvartui a ni a, khawnvartui a zawh chuan a phitá chu a alh zo tawh ngai lo," a ti.

West Tuipui bial chu tuna bialtu MLA Nihar Kanti Chakma te pafain kum 50 chuang an awp tawh tih sawiin Zorama chuan, "Congress bial him tak ṭhin a ni a, hmasawnna erawh hmuh tur a váng hle. He biala MNF candidate Pu Robert Hmingthansanga thlan tlin a nih chuan, bial dang thîk tham khawpa duhsak a ni ang," a ti a; Tlabung chu Mizoram luhka pawimawh tak ni tura chak taka buatsaih tum a nih thu a sawi.

October 24 zana Lungsen com­munity hall-a vantlang inkhawmah Zoramthanga chuan, Thoráng bial chu Zodintluanga'n kum 15 a enkawl tawh tih sawiin, "Kum 5 dang min enkawl leh rawh se, ti thei chu in zingah in awm tawhin ka ring lo. Congress thinlung ruhkawl pu tak tak chin lo chuan awmzia kan nei chuang lo ang in tih vek ka ring. In bialtu MLA/Minister hi thil a ti theiin, lal chhungkuaah a tel thûk hle a, heti chung hian Mizorama kawng chhe em em zingah a chhiat zual nasat lai berte zinga mi in la ni reng a ni," a ti.

MNF President hian nimin khan Tlabung Zodin indoor stadium-a vantlang inkhawmah thu sawiin, "Thla leha inthlanah khian Congress valhba kan pawtzîp dawn a ni," a ti a; miin MNF a sorkar ring lo se, Congress vice president ni lai R Lalzirliana, Congress MLA Lalrinliana Sailo, MPC MLA Lalthanliana ten MNF an zawm a rinawm loh thu leh, MNF-a an lawm luh zinga 90% vel chu Congress mi leh sate an nih thu a sawi.

Zoramthanga chuan Mizoram mipuite chu MNF zawm zel turin a sáwm a, "Congress chu pahmei thingkhawn chim angin a ni tèlin an chim hem hem mai a, sorkar lo tur chu heng mite hian hriain an tlansan chur chur a, mi dang pawh lo lut zel turin kan sawm a che u. Pathian leh mipui zarah MNF kan sorkar ngei dawn a ni," a ti.