SEDP dawng tur tlangzarh dawn

Veterinary, Fishery & Sericulture Board chu nimin khan an chairman Dr K Beichhua, AH&Vety minister  hoin Secretariat conference hall-ah an ṭhukhawm a; SEDP hnuaia AH&Vety department aṭanga ṭanpuina dawng turte November 25, 2020-ah tlangzarh an rél.

Dr K Beichhua chuan, tluang taka an kal zel theih chuan sa, artui leh bawnghnuteah Mizoram a intodelh theih a beisei thu a sawi a, "Chief Minister pawhin kan hmalakna min tuipui hle. SEDP thil tum angin, ran vulh lamah ṭhalai tam takin ke an pên mek hi lawmawm tak a ni. SEDP hnuaiah AH&Vety department chuan March 2020 aṭangin hmalak ṭan kan tum a, Covid-19 vangin hma a lâk chak theih loh a ni," a ti.

Veterinary, Fishery & Sericulture Board meeting hian vawk leh ár vulh ṭanpuina dawng tur beneficiary chhungkaw 1,020 thlan tawhte chu an pawm a ni.

Meeting-a tarlan danin, AH&Vety department hnuaiah kum 2019-20 chhunga SEDP kalpuina atan cheng nuai 1,860 ruahman a ni a; SEDP chu official-a tlangzarh a nih hnuah ṭanpuina dawng turte hnenah first instalment sum pek a ni ang.