NLUP kan sem chhunzawm dawn - Congress
Mizoram Pradesh Congress Committee (MPCC) treasurer H Liansailova chuan, Congress party-in sorkarna an siam chhunzawm chuan NLUP sem chhunzawm a nih tur thu a sawi a; Ayushman Bharat - Pradhan Mantri Jan Arogya Yojana (PMJAY) leh health care scheme-ah premium nei lote sorkarin an tumsak dawn thu a sawi bawk.
MPCC hotute'n nimina Aizawl Press Club-ah thuthar thehdarhtute an kawmnaah H Liansailova chuan, tun ṭum inthlanah hian ram hmasawnna tura phawrh thar tur an nei a nih pawhin, Congress sorkarin policy a neih mekte chu a chhúngmû a la ni reng tih a sawi a, "Kan sum dinhmun tlirin eng nge kan tih theih hi ngaihtuah a ngai a, kan ram mamawh eng nge tih ngaihtuah a ngai," a ti a; kut hnathawktute harsatna an hmuh hmaih thei lo tih a sawi.
NLUP chu mi 1,30,000 hnenah pek ni tawh mah se, mamawh an awm belh zel a, mi 2,50,000 an survey tawhte pawh pek chhunzawm an tum thu sawiin Liansailova chuan, "NLUP hi new version-in kalpui zel kan la tum a, NEDP nen a ṭul angin kalpui kawp a ni ang. Khawpuiah chuan land use tur tak tak a awm ve loh avangin poverty alleviation leh eizawnna tur dappuina a ni ber," a ti.
Health scheme chungchangah H Liansailova chuan, tun hnaia sorkar laipuiin scheme thar a kalpui Ayushman Bharat - Pradhan Mantri Jan Arogya Yojana (PMJAY) chu Mizoramah ṭha taka kalpui an tum bakah, Mizoram sorkarin scheme a neih mek nen a ṭul anga kan kawppui an tum thu leh premium pe thei lote sorkarin peksak dan an ngaihtuah dawn thu a sawi.
H Liansailova chuan, ṭhalaite harsatna sutkianna turin entrepreneurship lamah mumal leh awmze nei lehzuala hmalak chhunzawm zel an tum thu te, MIMER chu doctor specialist zirna ni tura thuam zel an tum thu te, 15th. Finance Commission hnuaiah sorkar hnathawk hlawhbi buaite chinfel an tum thu te, police leh department ṭhenkhata an chanvo tur housing, ration/rifle allowance rate tihsan leh thil dangte pek an tum thu a sawi bawk.
Congress minister Lalsawta pawhin PMJAY leh Mizoram health scheme scheme kai kawpin health care scheme thar siam an tum thu a sawi a, "Central scheme-a Rs. 5,00,000 thleng bill theih hi natna khirh bik neite tan a la tam tawk lo a, sorkar hnathawkte neih ang deuh thaw pek kan tum a ni," a ti.
Lalsawta chuan sorkar hnathawk hlawhbi buai tam tak chinfel te, sorkar hnathawkte tana housing ṭha zawk neih te, police-te ration/rifle allowance etc. rate tihsante sorkar tharah chuan an ngaihtuah tur thu sawiin, "Hengte hi 15th Finance Commission hmachhawn kan nih tak avangin sorkar tan tih a remchang ta rih lo a ni," a ti a, 15th Finance Commission-in a tih tur a tih chuan hente hi an tihpuitlin tur thu a sawi.