Secondary School Games-ah Lunglei district pakhatna an ni

October 23, 2018 aṭanga ṭan Mizoram Secondary School Games vawi 36-na chu nimin khan Chhangphut Field, Champhaiah khâr a ni a, gold medal 12 latu Lunglei district chu pa­khatna an ni.

Secondary School Games khârna inkhawm buatsaihah School Education director K Laldingliana chuan, a ṭum khatna atana Aizawl páwna Games nghah a ni chu thil huphurhawm tak ni mah se, tluang tak leh hlawhtling taka zawh a ni chu lawmawm a tih thu a sawi a, "Zirna huam zau leh chhawrnahawm siam kawngah ṭan lak a ni a, chumi tur chuan physical education lamah hmalak zel a ni. School games buatsaih a nih hian naupang leh zirtirtu te, hmun hrang hranga awmte inkarah inpawhna, inkawmngeihna leh thawhhona ṭha a siam ṭhin," a ti.

Mizoram Secondary School Games vawi 36-naah hian district pariat aṭangin zirlai infiammi eng emaw zat an tel a; pakhatna Lunglei district niin, gold medal 10 latu Champhai district pahnihna an ni a, pathumna chu gold medal pariat latu Aizawl district an ni. Best Athlete-te chu mipaah gold medal pathum latu Lal­muansanga, Aizawl district a ni a, hmeichhiaah gold medal pathum leh silver medal pakhat latu Elisian Medaii, Lunglei district a ni.