BJP leh Chakma telna sorkar a din loh nan ZPM a sorkar a ngai - Duhoma

Zoram Peoples' Move­ment (ZPM) chief ministerial candidate Lalduhoma chuan, BJP leh Chakma telna sorkar a din lohna turin Mizo mipuite'n ṭangrual pawl ZPM chu an sorkartir ngei a ngai tih a sawi.

Lalduhoma hian October 25, Ninga­ni zan khan New Ser­chhipa ZPM intuaitharna inkhawmah thu sawiin, kumina Mizoram MLA inthlanpui awm turah MNF leh Congress party-te chuan Chakma candidfate an nei dawn tih a sawi a, "Kan ram, hnam leh kan sakhua a hima a damna tur chuan Chakma, BJP thawhpui ve lo leh khawvel chakna leh theihna hmachhuan loa Davida rálthuam, Pathian chakna leh thiltihtheihna hmachhuan tlattu ZPM hi sorkarna kan chantir ngei a ngai a ni," a ti.

CADC inthlan hnu­hnung bera BJP nen thawk dun turin Congress leh MNF-te chu an inhruipawh ngat ngat tih sawiin Duhoma chuan, "He party pahnih hian lalna leh thuneihna duhna vangin kan ram leh hnam hi Chakma hnenah leh BJP hnenah an hralh phal a ni kan ti lo thei lo," a ti a; Mizote tana Chakma hnawksakzia leh BJP-in India ram aṭanga Kristianna hnawh bo a tum dante chu a chian thu leh, MNF chu BJP nen NEDA-a thawk dun mek an nih thu a sawi.

Lalduhoma chuan Congress leh MNF-te chu ram hmangaihna nei lo-ah puhin, "He ram hi engtin nge râltiang kai turin ka kaihhruai ang, tih aiin engtin nge lal

ṭhuthlengah ka ṭhut ang a, kan chhung leh khatte'n a thau kan sawh theih ang, tih bak an ngaihtuah lo a, sorkar hrim hrim tumin hma an la a ni," a ti. Congress leh MNF hruaitute'n Pathian duh dana ram an kaihhruai loh avangin Mizoram a damlo niin a sawi bawk.