Serchhipah inthlana duty turte zirtir

MIzoram MLA inthlanpui awm tura Serchhip district-a Assembly constituency pathuma duty tur team hrang hrang 10-te tan hnimin khan DC Conference Hall-ah training buatsaih a ni a, additional DC leh deputy district election officer Chuauhnuna'n a kaihruai.

Chuauhnuna chuan, inthlan buaipui tura sorkar hnathawk fel tak takte inpekna a thûk hlea a hriat thu sawiin, "Inthlanna felfai leh ṭha tak kan buatsaih theih ngei a beiseiawm," a ti a; mahni hna ṭheuh dik leh felfai taka thawk ṭheuh thei tura training ṭha tak an neih theih nan duhsakna a hlan.

Training-ah hian R Vanrengpuia, SDO(S)-in team hrang hrangte hnathawh dan tur a sawi a; Election Model Code of Conduct hnuaia phal leh phal loh te, vantlang hmunah political party flag leh banner târ phal chin te, commercial vehicle leh lirthei danga flag leh poster târ chungchangte leh Expenditure Monitoring hnuaia team hrang hrangte chanvote a sawifiah.

IPRO K Saitluanga pawhin video surveillance team, flying squad leh static surveillance team-a thla latute hriat tur a sawifiah a; thubuai hlabuai awm palh se, rorelna sanga dinpui tlaka ṭha thlalak nei thei ngei turin a chah.

Training ah hian team hrang hrang - liaison officer leh assistant liaison officer, liaison officer to CAPF, flying squad leh videographer, static surveillance team leh videographer, video viewing team, assistant expenditure observer, sector officer leh control room duty turte an tel a ni.