KHAWTHLIR

Khawzawl District Level Land Government Land Committee chu an chairman Zothanmawia, bawrhsap hoin nimin khan an ṭhukhawm a; Khawzawl Vengthara lei tlahniam vanga October 6, 2020-a mimal in rauhsan neitu chhungkaw pangate awmna tura ICDS ram âwl dilna chu an hnâwl. Meeting chuan, sorkar ram mimal pek chu kawnghmang loa an hriat avangin an hnâwl a ni. Chhungkaw pangate awmna tur ram chu Khawzawl Vengthar VC kutah an dah.

Sihphir Vengthar Pastor KṬP chuan nimin khan Synod Hospital Blood Bank-ah thisen unit 18 an pe a, a petute mipa 17 leh hmeichhia pakhat an ni.

State Referral Hospital ICU-ah Covid-19 vei mi pahnih enkawl mek an ni a, pakhat chu ventilator hmanga enkawl niin, pakhat dang pawh oxygen pek mek a ni. SRH-ZMC Bulletin tarlan danin, SRH-ah hian nimin khan Covid-19 vei mi pahnih dah luh niin, 46 an awm mek a, kum 60 chung lam mi 19 leh kum 14 hnuai lam pakhat an tel a ni.

Kolasib district magistrate Dr H Lalthangliana chuan thuchhuah siamin, tun hnaiah Bairabi chhehvela Tlawng lui dungah leh khàn dang aṭangin state páwn lam mi, ILP nei lo leh dan loa Mizoram luh rûk tum an pung chhoa hriat a nih thu a tarlang a; dan loa Mizorama lutte chu hrem theih an nih thu a puang. Dan bawhchhiate chu Rs. 5,000 thleng chawitir theih a ni a, DC chuan Bairabi Police Station leh Joint Village Task Force-te chu lo bawhzui turin a ngen.

General Administration department chuan district thar pathum - Saitual, Hnahthial leh Khawzawl district hnuaia civil sub-division-te leh an hnuaia khua awm turte an tifel. Hemi chungchangah hian November 9, 2020 khan hriattirna a chhuah a ni.

Siaha DC chuan nimin khan thupek chhuahin, mipuite Covid-19 laka an him zawk theihna atan an district tlawhtute chu ni 14 inkhunghran tur a nih thu a tarlang a, "District dang aṭanga Siaha lo thlengte ni 14 chu an inkhunghrang (home quarantine) ang a, VLT-te'n uluk takin an vilzui ang," a ti.