Ruling leh eptute an inhnial hnuah Supplementary Demand pass a ni

Nimina Assembly session-ah kum 2021-22 chhunga sum indaih lohna phuhrûkna tur Supplementary Demand for Grants cheng vbc. 2,161.47 chu pawm (pass) a ni. Supplementary Demand pawm a nih hma hian rorel lai member-te leh eptu member-te chu an inhnial.

Supplementary Demand hi February 24, 2022 khan 2022-23 budget pharh rualin Finance changtu chief minister Zoramthanga'n House-ah a pu lut tawh a; Chief Minister chuan, Supplementary Demand-a sum awm zawng zawng chu cheng vbc. 6,025.44 a nih thu sawiin, "Cheng vbc. 3,863.97 chu House-in a pass a ngai lo charged a ni a, House-a pawmpui ngai voted expenditure erawh chu cheng vbc. 2,161.47 a ni," a ti.

Supplementary Demand-a hlâwm lian ber chu sum harsatna vanga RBI aṭanga ways and means advance an lakna a nih thu sawiin Zoramthanga chuan, "Kan sum dinhmunin a zir loh avangin hei hi pumpelh duh hle mah ila pumpelh theih a ni lo. Ways and means advance hi kan state hian vbc. 256 aia tam vawi khatah kan la thei lo," a ti a, vbc. 256 a pelh chuan over draft a nih nghal ṭhin thu a sawi.

Finance Minister chuan, kum 2021-22 chhungin ways and means advance cheng vbc. 3,762.88 an pûk thu sawiin, "Vawi khatah tlemtê têin kan puk. Heng hi Supplementary Demand-ah tarlan a lo ngai ta ṭhin a ni. Ways and means advance rulhna hi charge expenditure a ni a, House-in a pass a ngai lo," a ti.

Supplementary Demand for Grants chungchangah hian oppostion group leader Lalduhoma chuan, sawiho loa sum tam tham tak pass chu ṭha loa a hriat thu sawiin, sawiho a rawt a ni.

Chief Minister chuan, tun hma aṭangin Mizoram Assembly House-ah supplementary demand chu sawiho a nih ngai loh thu sawiin, "Sawiho hrim hrim hi kan duh lo pawh a ni lo. Rawtna a awm avanga sawiho ngawt tur erawh a ni lo. A ngaihtuahtu tur an awm," a ti.

Speaker Lalrinliana Sailo chuan, Mizoram Assembly-in kum 50 a tling tawh a, kum 50 chhungin supplementary demand sawiho a la nih ngai loh thu sawiin, sawiho lo turin thutlukna a siam a ni.

Nimin vêk khan chief minister Zoram­thanga'n Economic Survey of Mizoram 2021-2022, 15t Annual Report of the Mizoram Information Commission a pharh a; Health minister Dr R Lalthangliana'n 'The Mizoram Epidemic Diseases (Covid-19) Regulations, 2022 pharhin, Taxation minister Lalchamliana'n 'Mizoram Goods and Services Tax Act, 2017' a pharh bawk.

PWD changtu chief minister Zoramthanga chuan, dan siamṭhatna tur, The Mizoram Road Fund (Amendment) Bill, 2022 (A bill further to amend the Mizoram Road Fund Act, 2007) a pu lut a, pawm a ni. Chumi hnuah kum 2022-2023 Mizoram budget a tlangpuia sawiho a ni a, vawiinah sawiho chhunzawm a ni ang.