Kuhva tawlh ṭhat lohzia leh a serious zia kan hriat avangin khap turin hma kan la - Home Minister

Home minister Lalchamliana chuan, kuhva rah tawlh rûk ṭhat lohzia leh a serious zia Mizoram sorkarin a hriat tawh avangin khap tura hmalak a nih thu nimin khan Assembly House a hrilh.

INC member C Ngunlianchunga chuan, Mizoram sorkarin Champhai DC Maria CT Zuali chu sorkar aiawha awm a nih angin court-ah sorkarin a chhan dawn leh dawn loh te, Mizoramah smuggling phal a nih leh nih loh te, kuhva rah tawlh rutu mante hrem tum an nih leh nih loh te, a hmuna azirin sorkarin smuggling hai der a neih leh neih loh te, kuhva tawlh rûk chungchanga sorkar hmalaknate leh kuhva rah tawlhah police lal inrawlh an awm leh awm lohte a zawt a ni.

Home Minister chuan, Cham­phai DC chhan tumna emaw, chhan loh tumna emaw a la awm loh thu sawiin, "Report a la rawn lut lo," a ti. C Ngunlianchunga chuan, Champhai DC chu Gauhati High Court-ah khin a nih thu a sawi.

Kuhva rah tawlh man sakte chu pawisa chawitirin emaw, kawng dangin emaw hrem an nih thu sawiin Lalchamliana chuan, "Court-ah kuhva rah tawlhtute tu mahin an la khing lo. Anmahni zawk hian an khing lêt lo chauh. February 2021-a Assembly session-ah khan Mizote'n kuhva rah tawlh chu an hlâwkpui tho avangin mit a siai thu ka sawi. Tunah chuan kuhva rah tawlh hi sorkarin a serious leh ṭhat lohzia a hre tawh a, khap turin hmalak a ni," a ti.

Home Minister chuan, sorkarin kuhva rah tawlhah police lal an inrawlh tih hriatna a nei lo tih sawiin, "Chiang taka report a awm lo. Social media velah chuan sawi a awm a ni thei a, kei chuan social media-a thu post na zawng hi ka ring lo," a ti.

C Ngunlianchunga chuan, January 28, 2022-a party pakhatin press conference an neih ṭumin kuhva rah tawlhah police lal pakhat a inrawlh tih chiang taka an sawi thu a tarlang.

Home Minister chuan, kuhva rah tawlh chungchangah ama hoin ṭum hnih leh Chief Secretary kal chhuak ta hoin ṭum thum ṭhutkhawm a ni tawh tih sawiin, "DC leh SP-te lo check a, tawlh ru an awm chuan man turin thupek an ni a, hei hi thupek ding lai a ni," a ti.

MNF member H Biakzauva zawhna chhangin Lalchamliana chuan, "Ka hriatthiam dan leh dan hremite min hrilh dan chuan, police leh excise-te ang thoin DC-te hian khap thil an man thei a, a hmuna tihchhiat theihna an nei lo," a ti a; DC-te'n khap thil an man a nih pawhin dan anga kalpui a, Court thu anga mante chu tihchhiat theih a nih thu a sawi.