Covid-19 donaa Mizoram hmalakna Union Health Minister-in ṭha a ti

Union minister of state for Health & Family Welfare Dr Bharati Pravin Pawar chuan nimin khan Secretariat conference hall-ah Health minister Dr R Lalthangliana leh HFW department hotute a kâwm a, Covid-19 donaa Mizoram hmalakna a hriatte chu ṭha a tih thu a sawi tih sorkar thuchhuakin a tarlang.

Dr Bharati Pravin Pawar chuan, National Health Mission (NHM) hnuaia ECRP Package I leh II-a Mizoramin sum a dawn zat te, 15th Finance Commission hnuaia hriselna atana sum a dawn te, PM-ABHIM hnuaia sum dawnte aṭanga hma lak dante a zawt a; Mizoram Cancer Institute mamawh ṭhenkhatte chu PM-ABHIM hnuaiah ruahmanna siama thehlut turin a hrilh.

Union Minister chuan, National Family Health Survery thar bera Mizoram dinhmun tarlan zingah, anaemia tam dan, zûk leh hmuama Mizoram dinhmun leh nu nau paite a hun taka inentir kawnga hnufualna nia langte siamthat nan ṭan lak theih ni se a duh thute a sawi a; Health department hotute chu thingtlanga hriselna dinhmun ngai pawimawh zual tur leh CHC, PHC leh sub-centre-te tlawh fo turin a chah bawk.

Dr R Lalthangliana chuan hriselna lama Mizoram mamawhte Union Minister hnenah ziakin a thlen a; PHC leh community health centre (CHC)-a ambulance hman mekte chu a hlui tawh avangin ambulance thar 30 pe turin a ngen.

R Lalthangliana chuan, Covid-19 dona scheme hrang hrang aṭanga Mizoramin damdawi leh hmanrua a dawn leh, tun hnaia AYUSH lama Mizoramin duhsakna a dawngte chu lawmawm a tih thu a sawi a; hmarchhak biala state-te chu state dangte nen tehkhinin an hnufûm bik tih sawiin, "Funding pattern leh guidelines-te siamṭhat leh ennawn a ṭul a, chumi atan chuan hmarchhak health minister-te nen sawiho a ṭul," a ti.

Ṭhutkhawma tarlan danin, Mizoramah district hospital 12, sub-district hospital pahnih, CHC pakua, PHC 61, sub-centre 379 leh hmun kilkhawra mipui hriselna enkawlna tur health clinic 170 a awm mek a; chu'ngah chuan khum 2,197 a awm. Mizorama mimal damdawi-inah khum 1,589 a awm bawk.

HFW department-ah post chi hrang hrang 19 awmin, chu'ngah chuan sanctioned post 3,896 a awm a, post 2,880 hnawhkhah niin, post ruak 1,016 a awm. 15th Finance Commission hnuaia hriselna kawnga hmalakna atan sum cheng vbc 31.19 hmuh a ni a; PM-ABHIM hnuaia kum nga chhunga Mizoramin sum a dawn tur chu cheng vbc 28.30 a ni.

Kum 2021-22 chhungin Mizoram State Health Care Scheme (MSHCS)-ah chhungkua 87,695 an inziak lut a, MR bill dilna 22,589 awmin, chu'ng bill belh khawm chu cheng vbc 59.09 a ni. AB-PMJAY hnuaiah chhungkua 1,94,859 an inziak lut a, dilna 11,252 awm mekin, MR bill belh khawm chu cheng vbc. 13.44 a tling.

ZMC-ah MBBS zirlai 372 an awm mek a, ZMC leh State Referral Hospital-ah thawktu mi 736 awm mekin, chung zinga 142 chu zirtirtu an ni. SRH-ah ICU tiamin khum 316 a awm a, kumin kum tawpah khum 500 vel awm thei tura hmalak mek a ni.

Health Minister R Lalthangliana thu thlen
1) District thar pathumah khum 75 ṭheuh awm theihna tur district hospital sakna tur sum ngaihtuahsak.
2) ZMC-a lung, kal, thâ leh thluak lam superspeciality dinna kawnga puih.
3) Lung (heart) leh kal (kidney) lam inenkawlna Aizawl Civil Hospital-a neih mek tihlen leh tihchangtlun dan kawng dappui.
4) PHC leh sub-centre sak ṭhatna tur ngaihtuahsak.
5) Scheme thar hnuaia ram puma rilru lam enkawlna mental hospital 40 din turah Mizoram telh.
6) ZMC chu central funding-a enkawl dan ngaihtuah leh a hnuaia ruhrel mamawh zual din belhna tur sum ngaihtuahsak.