Bamboo plantation atan cheng nuai 877.57 sêng tawh Mau/ruain economy chawi kân tum a ni - CM

Nimina Assembly session-ah Horticulture changtu chief minister Zoramthanga chuan, mau chìn (bamboo plantation) atan cheng nuai 877.57 sèn a nih tawh thu leh, mau/rua hmangin Mizoram economy chawi kân tum a nih thu Assembly House a hrilh.

Mau hmanga intodelh tum a nih dan INC member C Ngunlianchunga'n a zawhna chhangin Chief Minister chuan, "Mau/ rua hmanga thil siam hrang hrang - agarbati stick, handicraft, bamboo timber, bamboo plyboard, bamboo charcoal, cultery item, adt. tihchhuah a, heng thil siam chhuah hrang hrang hian intodelh leh ram economy pawh chawikan tum a ni," a ti a; mau chi 3,34,425 supply a ni tawh tih a sawi.

INC member Lalrindika Ralte zawhna chhangin Zoramthanga chuan, bamboo plan­tation atan cheng nuai 877.575 sên a nih tawh thu a tarlang a, "Mau hi chìn ṭan chauh a la nih avangin tun dinhmunah a hralhna tur ngaihtuah a la ni lo," a ti. Mau chìn a hlawhtling thawkhata Mizoram sorkarin a ngaih leh ngaih loh zawhna chu 'Ngai e' tiin a chhang bawk.