KHAWTHLIR
Grape chíngtute tan Ruahmanna siam lo
Horticulture changtu chief minister Zoramthanga chuan nimin khan ZPM member VL Zaithanzama zawhna chhángin, tun dinhmunah Hnahlan, Champhai leh hmun hrang hranga grape chingtute tan ruahmanna hranpa siam a awm loh thu House a hrilh.
Nuai 600 ruahman
Kawnpui Field no. 2 zauh nan leh phûl lem phahna atan Ministry of Finance-in cheng nuai 600 a sanction tih nimin khan sorkar thuchhuakin a tarlang a, "Mizoram State Sports Council chu working DPR siam turin Mizoram Planning department-in a hriattir tawh a, March 2023 ral hmaa zo hman turin MSSC-in hma an la dawn," a ti.
Ṭawngkam mawi hmang turin ngen
Peoples' Conference party chuan thuchhuah siamin, Assembly session neih mekah ṭawngkam mawi lo leh déngkháwng tak tak hman chíng MLA an la awm fo chu pawi an tih thu an tarlang a, "MLA-te hian ṭawngkam mawi leh hawihháwm zawk hman tum hrâm hrâm se kan duh hle," an ti.
Conference-ah tel
Ministry of Jal Shakti huaihawt-in nimin khan Assam Administrative Staff College, Guwahati-ah Regional Conference of North Eastern States on Jal Jeevan Mission & Swachh Bharat Mission neih a ni a, Jal Shakti minister Gajendra Singh Shekhawat-a'n a hmanpui. He hunah hian Mizoram aṭangin sorkar official-te an tel a ni.
PWD E-in-C
PWD engineer-in-chief kal chhuak Lalmuankima Henry chuan nimin khan engineer-in-chief thar Bowman-a hnenah mawhphurhna a hlân.
Hêl turin chah
Aizawl Traffic SP Rodingliana Chawngthu chuan, SIPMIU-in Vaivakawn leh Zohnuai péng inkarah pipe phûm hna an thawh mek avangin a hêl theihna kawng danga kal zawk turin mipui a chah. Lengpui Airport aṭanga zin chhuak turte chu traffic jam vanga tlai palh awm thei a nih avangin a hma thei ang bera inruahman lâwk turin a chah bawk.
Meizial tichhia
Champhaia Legal Metrology department-in kum 2021 chhunga ram dang aṭanga dan loa lak luh meizial (cigarette) báwm 52,000 an man chu nimin khan Controller of Legal Metrology thupek leh District Magistrate hriatpuinain tihchhiat a ni. Meizial tihchhiat hi cheng nuai 26 mana chhût a ni.