Oil palm chìn belh záwngin Mizoram sorkar kal a tum lo

Nimin Assembly session-ah chief minister Zoramthanga chuan, oil palm chìn belh vak vak zawngin Mizoram sorkar kal a tum tawh loh thu a sawi.

INC member Zodintluanga Ralte zawhna chhangin Chief Minister chuan, Mizoramah oil palm nasa zawka chíng tura hmalakna a awm loh thu a sawi a, "Kum 2006 aṭanga kalpui dan kha a pangngaia la kalpui reng a ni. Sorkar laipui aṭangin Mizoramah oil palm chíng tura nawr luihna a awm hran lo. Mizoram sorkarin sorkar laipui lamah oil palm chíng tura ṭanpuina a dil lo," a ti.

Mithiamte'n oil palm-in environment a tihchhiat nasat thu an ziah nasat thu sawi chhuah a nih chungchangah Zoramthanga chuan, "Inhnial theih tak tur a ni ang. Environment, ecological leh economy en kawp a ngai," a ti a; Mizoram sorkar chuan mipui economy a dah pawimawh ber a, a dawtah nungcha leh environment lam a dah pawimawh thu a sawi.

Chief Minister chuan, ecological leh environment ringawt ngaihtuah theih a nih loh thu sawiin, "Hemi ringawt kan ngaihtuah chuan lo vah, lo neih leh lo hâlte tih tawh loh tur tih ni ta se, a dik chiah a ni," a ti.

Tél indaih lohna avangin sorkar laipuiin oil palm chìn a tharthawh leh thu sawiin CM Zorama chuan, "Anni rawn tih vang ngawtin oil palm chìn belh vak vak zawngin kal kan tum lo. A chíng tawh sate tana a phurh chhuahna kawng siam leh a sàwrna a hnai thei anga dah zawnga kal kan tum," a ti a; oil palm chíng tawh laklawhte chu khawngaihthlak taka an awm lohna tur ngaihtuahpui tum a nih thu a sawi bawk.