MP Vena’n sawhthinga harsatna a bawhzui

Rajya Sabha MP K Vanlalvena chuan February 27, Pathianni khan Aizawla BSF deputy inspector general (DIG) Rajesh Kumar kâwmin, Mizorama sawhthing chíngtute harsatna a sawipui a; Mizoram aṭanga Bangladesh-a hralh tur sawhthingte chu lo tihdin emaw, man emaw chu thil ṭul ni loa a hriat thu a hrilh.

K Vanlalvena chuan, Mizorama sawhthing chíngtu ṭhenkhatte’n Tlabung bul Khawthlangtuipui kaltlanga Bangladesh-a an sawhthing thar chhuahte hralh an duh thu leh Tlabung chhehvela BSF-te nena inhriatthiam tawnna an neih a ṭul thu a sawi a, “Bangladesh leh Mizoram insumdawn tawnna tur border haat hmun pathuma neih turin Ministry of External Affairs hotute nen a thuphungin kan sawi fel tawh a, Kawrpuichhuahah Indo-Bangla Trade Centre din turin India leh Bangladesh sorkarte’n inremna neih tawh chu bawhzui mek a ni,” a ti.

K Vanlalvena chuan, “Mizorama sawhthing tharte hi Assam sumdawng hote’n an rawn lei ṭhin a, Bangladesh-ah tho an hralh ṭhin. Hetianga khàrchhawntir loa kut hnathawktute’n Khawthlangtuipui kaltlanga Bangladesh-a hralh tlang mai hi an mamawh a ni,” a ti a; Mizoram aṭanga Bangladesh-a hralh tur sawhthingte chu tih din emaw, man emaw chu thil ṭul ni loa a hriat thu a sawi.