Hripui vei ni 55 hnua hmuh tlem ber ní a thleng

February 27, Pathianni khan Mizoramah Covid-19 vei mi 211 hmuh chhuah a ni a, ni 55 hnua hmuh chhuah tlem ber ṭum a nih bakah, ni 36 hnua hnua positivity rate 20% aia a hniam vawt khatna a ni. Nimin khan hripui vei dam tawh mi 1,713 chhuahtir an ni a, thi an awm lo.

Pathiannia hripui vei hmuh chhuahte chu mipa 94 leh hmeichhia 117 niin, RAT hmanga hmuh vek an ni a, swab sample endikna dang hmangin endik a ni lo. Sample endik zat 1,092 aṭanga positive zat 211 chu 19.32% a ni.

February 27-a Covid-19 positive hmuh zat mi 211 chu kumin February 2 hnua hmuh chhuah tlem ber ní a ni a, February 2 khan mi 152 hmuh niin, January 1-ah mi 84 hmuh chhuah a ni. Positivity rate pawh ni 36 chhung a záwna 20% chung lam a nih hnua 20% aia hniam a nih lehna hmasa ber a ni a; January 22, 2022 aṭang khan ni tin positivity rate 20% aia sang vek a ni.

Nimin tlai dar 5 thleng khan hripui vei dam tawh mi 1,713 chhuahtir an ni a, district tina chhuak zat chu - Aizawlah min 500, Serchhipah 226, Lungleiah 204, Mamitah 162, Kolasib-ah 149, Khawzawlah 129, Champhaiah 113, Saitualah 97, Hnahthialah 66, Lawngtlaiah 46 leh Siahaah mi 20 an ni.

IDSP record angin, Mizoramah Covid-19 vei 2,13,328 hmuh chhuah a ni tawh a, mipa 99,744 leh hmeichhia 1,13,584 an ni a, mipa aiin hmeichhia 13,840-in an tam zawk. Nimin tlai dar 5 thleng khan mi 2,07,116 (97.09%) chhuahtir an ni tawh a, mi 657 (0.31%) thi tawhin, enkawl mek mi 5,555 (2.60%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,13,328 chu mi 1,000 zelah hripui vei mi 195 an awm ang a ni a; mi 1,00,000 zela Covid-19 vangin mi 60 an thi tawh ang a ni tih sorkar thuchhuakin a tarlang.

Mizoramah February 27, 2022 thlenga swab sample endik tawh 18,26,335 aṭanga positivity rate chu 11.68% a ni a; RT-PCR hmanga endik zat percentage chu 20.28 a ni a, RAT hmanga endik zat chu 74.05% a tling.