Mizoramah super speciality hospital din turin BJP-in Union Minister an ngen

BJP, Mizoram Pradesh chuan ni thum cháma Mizorama rawn zin Union minister of state for Health & Family Welfare Dr Bharati Pravin Pawar hnenah nimin khan memorandum thehlutin, Mizoramah AIIMS ang medical college changtlung emaw, super speciality hospital emaw din a nih theih nan hma la turin an ngen.

Union Minister hian nimin khan Mizoram BJP pisa tlawhin, president Vanlalhmuaka leh hruaitu dangte nen an inkâwm a; sorkar laipuiin Mizoram district tinah damdawi-in tihchangtlun a nih tur thu te, zirna lamah hnam hnufualte ṭanpui tum a nih thu leh Mamit district phei chu a hmun ngeia a hmuh avangin puih an ngaihzia a hmuh thute a sawi a, “Central chuan kawng tinrenga Mizoram chawi kàn tumin hma a la a, hmarchhak state-te hi nasa taka chawi kàn tum ni,” a ti.

Dr Bharati Pravin Pawar chuan, Mizoramin damdawi-in ṭha an mamawh tih sawiin, “Hmarchhak state-te tana hriselna lam ṭanpuina tur Central-in sum a ruahmanah pawh Mizoram hi ngaihtuah hmasak a nih theihna turin hma ka la dawn a ni,” a ti a; kawng, kawlphetha leh thil dangahte pawh Mizoram mamawhte sorkar laipuiah nasa zawka hmalak a tum thu a sawi.

Bharati Pawar chuan, National Health Mission (NHM) kaltlangin Mizoram tan cheng vbc. 44 dah a nih thu sawiin, “Miretheite tana PM health insurance scheme Aayushman Bharat mi tam zawkin kan chhawr theih nan hmalak a pawimawh a ni,” a ti a; Mizorama ration card nei lote’n an neih theih vek nan hma la turin BJP member-te a chah. Mizoram nuam a ti a, Mizo mipui hmuh nuam a tih thu leh kawm nuam a tih thu a sawi bawk.

Mizoram BJP-in Union Minister hnena memorandum an thehluhah, ZMC tan full-fledged director ruat tura an ngen thu te, district tinah RT-PCR khawl bun tur leh, a theih loh pawhin mobile laboratory pakhat tal pe tur an ngen thute an tarlang a ni.