Darlawn PHC saknaah eirûk a awm ring

ZPM Ṭhalai chuan, “Chief Minister leh Health Minister hi ram hmasawnna aiin restricted tender pekah an intlansiak em ni?” an ti a; Darlawn PHC sakah eirûkna lian tak a awm an rin thu an tarlang.

ZPM Ṭhalai Headquarters leh Tuivawl South Block hruaitute chuan nimin khan Darlawn damdawi-in (PHC) sak thar an tlawh a; thuchhuah siam nghalin, Health & Family Welfare department hnuaiah September 7, 2021 thleng khan restricted tender hmangin cheng nuai 5,500 chuang man hna pek a nih thu leh chu’ng zinga hna 12, cheng nuai 3536.648 man chu Zamzo Engineer, Construction & Consultancy, Bawngkawn hnenah pek a nih thu an sawi.

Darlawn PHC sak thar chu Rs 1,40,21,000 séngin Mizoram Technocrats Company (P)Ltd., Sikulpuikawn saktir a nih thu sawiin ZPM Ṭhalaite chuan, “Kan enfiahnaah thil fel lo chi hrang hrang kan hmu a, kawlphetha pawh luhna pawh leiah zam mai mai a ni a, building chhuat zût màm loh a tam a, chhuat inàwn hleih a tam hle,” an ti a; thil dang ṭha lote pawh tarlangin, sum ruahman leh hnathawh inrem loa an hriat thu an tarlang bawk.

ZPM Ṭhalai chuan, “Darlawn PHC sak hi a chhe hle a, eirûkna lian tak a awm kan ring tlat,” an ti a; Darlawn damdawi-in sak chu enfiah a, a nih dan tur ang taka siamṭha turin Mizoram sorkar an ngen a ni.