MZU-in MZU leh PUC zirtirtu 20 hnenah MP/MLA candidate nih phalna a pe tawh

Mizoram University (MZU) chuan Assembly leh Parliament inthlanah MZU leh Pachhunga University College-a zirtirtu mi 20 hnenah political party-a tela candidate nih phalna a pe tawh. Kumin 2018 Assembly inthlan turah MZU leh PUC-a zirtirtu paruk chu candidate an nih tur thu puan chian a nih tawh laiin, MZU-ah dilna an la thehlut lo.

RTI Act hmanga zawhna chhangin MZU SPIO leh Joint Registrar chuan, MZU leh MZU hnuaia constituent college PUC-a thawk zirtirtute chu MP leh MLA inthlanah an chuh phalsak a nih thu a tarlang a; MZU Regulations RE-6 Clause-1 hmangin MZU Executive Councilin inthlana din a phalsak thei a ni.

MZU SPIO tarlan danin, hriat theih chinah MZU leh PUC-a thawk zirtirtu mi 19 chu MLA candidate an ni tawh a, mi pakhat chu Lok Sabha inthlanah candidate a ni tawh. Kumin 2018-a Mizoram legislative Assembly inthlanpui atan erawh MZU-in dilna a la dawng lo a, phalna pek pawh a la nei lo.

Hriat theih chinah kumin 2018 MLA inthlanpui awm turah MZU leh PUC zirtirtu eng emaw zat chu political party hrang hrang aṭangin candidate an ni dawn a, tun thlengin MZU-ah hian dilna an la thehlut lo thung. MLA candidate tura puan chian tawhte chu MNF aṭangin mi panga leh ZPM aṭangin mi pakhat an ni.

RTI Act hmanga zawhna chhannaa a lan danin, MZU Regulations, Section 26(r) of the Mizoram University Act 2000 leh Ordinance OE-6 Clause 19(3)-in a tarlan dan chuan, Mizoram University hnuaia zirtirtute chu MZU Executive Council-in kaihhruaina a siam angin parliament/state legislature/district council member ni turin a phalsak a ni.

Parliament/state legislature/district council member tura thlan/ruatte chu nemngheh an nih loh (probation) chuan extraordinary leave pek theih a ni lo. Parliament/state legislature/district council member tura thlan/ruat a nih a, extraordinary leave a dil chuan a hnuaia mi ang hian pek theih a ni.

i) Leave lak a ngai lo. Mahse, an duh a nih chuan extraordinary leave, University Ordinance-in zirtirtute leave neih dan a sawinaa mi angin ngaihtuahsak theih a ni.

ii) Leave an la lo a nih chuan university-ah administration thilah nihna leh mawhphurhna pawh an chelh thei lo a, zirna kaihhnawih thil (academic work), zirtir hna leh research thilahte chuan university-in a chhawr theihin an awm tur a ni.

iii) Zirtir hnaah university-in zirtirtute tana thawh tur a bithliahsak zat ve an thawk tur a ni.

iv) University hlawh leh parliament/state legislature/district council member hlawhah an duh zawk zawk an thlang thei.

A chunga mite bakah hian, university zirtirtute leave neih dan Ordinance-a awm angin, nihna pawimawh an chelh chhung chu extraordinary leave an la tur a ni a, mahse, hetiang atana an leave lak zawng zawng belhkhawmin kum 10 a pêl tur a ni lo tih a awm bawk.

Hetih lai hian, kum 10 chhung MLA ni tawh leh leave la tawh zinga pakhat, Dr R Lalthangliana chu kum 10 chhung leave a lak tawh avangin a hna aṭanga a bàn a ngai dawn em tih zawh a ni a; Dr R Lalthangliana chuan, "Pu Chama (Lalchamliana) nen kum 10 MLA kan ni ve ve tawh a, tunah hian MZU-in election contest phalna min pe leh ang a; sorkar ta ila, leave min pe thei tawh lo thung. Mahse, zirtirtu kan la ni thei reng a, dân an en ang a, official post pawimawh an chelh avangin zirtirtu dang aiin an work load tihtlem theih a ni ang, tih dân a awm," a ti.

Dr R Lalthangliana chuan, "Kum 2008-2013 thleng khan MLA hlawh la loin zirtirtu hna ka thawk reng a, bàn kher a ngai lo a, zirtir hna kan thawk thei tho. Mahse, full pension nei thei tawh kan ni a, election result chhuah hnuah option khawi zawk nge kan thlan dawn tih kan tichiang tawh mai ang," a ti a; amah ang chi chu India ramah an tam niin a sawi.

'MZU leh PUC-a thawkte political party-ah affiliation/membership an nei thei em?' tih zawhna chu MZU SPIO chuan, "UGC Report of Task Force on Code of Professional Ethics for University and College Teahcers 1989-a inziak angin, NEHU Mizoram Campus leh PUC hi NEHU hnuaia a awm lai aṭang tawhin political party-a affiliation/membership hi inkhap a ni lem lo niin a lang," tiin a chháng. Zirtirtute'n leave an lâkin, hlawh punna leh seniority chhûtnaah harsatna a siam lo ang tihte a awm bawk.

MZU-in MP/MLA atana phalna a pek tawhte
Mizoram Legislative Assembly Election 2003
# Hming Department Institution
1. Prof. Tlanglawma Economics MZU
2. Sanghmingthanga H Pautu Poltical Science PUC
3. Dr Lalzama Mizo PUC
4. Dr R Lalthangliana Sociology PUC
5. Lalchamliana Poltical Science PUC
Mizoram Legislative Assembly Election 2008
# Hming Department Institution
1. Dr F Lalnunmawia Forestry MZU
2. Sanghmingthanga H Pautu Poltical Science PUC
3. Lalhimpuii Geography PUC
4. Dr LH Chhuanawma Poltical Science PUC
5. L Thangmawia Mathematics PUC
6. Dr R Lalthangliana Sociology PUC
7. Dr Lalzama Mizo PUC
8. Lalchamliana Poltical Science PUC
Mizoram Legislative Assembly Election 2013
# Hming Department Institution
1. Dr R Lalthangliana Sociology PUC
2. Dr LH Chhuanawma Poltical Science PUC
3. L Thangmawia Mathematics PUC
4. Dr JV Hluna History PUC
5. Dr H Lallungmuana (on contract) Mizo MZU
6. Lalchamliana Poltical Science PUC
Member of Parliament (Lok Sabha) Election 2004
# Hming Department Institution
1. Dr Laltluangliana Khiangte Mizo MZU
Assembly Election 2018-a Candidate turte
(MZU-in phalna a la pe lo)
# Hming Department Institution Party
1. Dr R Lalthangliana Sociology PUC MNF
2. L Thangmawia Mathematics PUC MNF
3. Dr F Lalnunmawia Forestry MZU MNF
4. Lalchamliana Political Science PUC MNF
5. Dr Vanlalṭanpuia Philosophy PUC MNF
6. Dr Vanlalthlana Commerce PUC ZPM